കോഴിക്കോട്: വാണിജ്യ വിഭാഗത്തെ കൂടുതല്‍ ശക്തിപ്പെടുത്തി കേരള സോപ്‌സ് വിപുലീകരിക്കുമെന്ന് വ്യവസായ വകുപ്പ് മന്ത്രി ഇ.പി ജയരാജന്‍. കോഴിക്കോട്ട് കേരള സോപ്‌സ് ഫാക്ടറി സന്ദര്‍ശിച്ച ശേഷം സംസാരിക്കുകയായിരുന്നു മന്ത്രി.
കുത്തക കമ്പനികളോടാണ് കേരള സോപ്‌സിന് മത്സരിക്കേണ്ടത്. ഈ വെല്ലുവിളി സ്വീകരിച്ച് മികച്ച ഗുണമേന്മയിലും ആകര്‍ഷണീയമായ രീതിയിലും കേരള സോപ്‌സ് ഉല്‍പന്നങ്ങള്‍ വിപണിയിലിറക്കും. ഹാന്‍ഡ് വാഷ് പോലുള്ള പുതിയ ഉല്‍പന്നങ്ങളും ഉടന്‍ കേരളാ സോപ്‌സ് പുറത്തിറക്കുമെന്നും മന്ത്രി പറഞ്ഞു.
കേരള സോപ്‌സ് ഇടവേളയ്ക്ക് ശേഷം തുറന്നപ്പോള്‍ മുതല്‍ നഷ്ടത്തിലായിരുന്നു. പക്ഷെ ഇപ്പോള്‍ അതില്‍ നിന്നു കരകയറാന്‍ സാധിച്ചിട്ടുണ്ട്. മറ്റു സംസ്ഥാനങ്ങളില്‍ കൂടുതല്‍ വിപണികള്‍ കണ്ടെത്താനായെന്നും ചൈന ഉള്‍പ്പെടെയുള്ള വിദേശരാജ്യങ്ങളിലേക്ക് കേരള സോപ്‌സിന്റെ ഉല്‍പന്നങ്ങള്‍ കയറ്റിയയക്കുന്നുണ്ടെന്നും അദ്ദേഹം പറഞ്ഞു. കമ്പനി മാനേജ്‌മെന്റ് പ്രതിനിധികളുമായും തൊഴിലാളി സംഘടനാ പ്രതിനിധികളുമായും മന്ത്രി ചര്‍ച്ച നടത്തി.