എടപ്പാള്‍: പൊന്നാനി ബ്ലോക്ക് പഞ്ചായത്ത് 2018-19 പദ്ധതിയില്‍ ഏഴ് ലക്ഷം രൂപ വകയിരുത്തി മലബാര്‍ കാന്‍സര്‍ കെയര്‍ സൊസൈറ്റി കണ്ണൂരിന്റെ സഹകരണത്തോടെ സഞ്ജീവനി, സമഗ്ര കാന്‍സര്‍ നിയന്ത്രണ പദ്ധതി നടപ്പിലാക്കുന്നതായി ഭാരവാഹിക വാര്‍ത്താ സമ്മേളനത്തില്‍ അറിയിച്ചു.
പൊന്നാനി ബ്ലോക്ക് പഞ്ചായത്ത് പരിധിയിലെ കാലടി, തവനൂര്‍, വട്ടംകുളം, എടപ്പാള്‍ പഞ്ചായത്തുകളിലെ നാല്‍പതിനായിരത്തിലധികം വീടുകളില്‍ 1400 ല്‍ അധികം സന്നദ്ധ പ്രവര്‍ത്തകര്‍ സര്‍വ്വേ നടത്തുകയും രോഗലക്ഷണമുള്ളവരെ കണ്ടെത്തി ക്യാമ്പുകളില്‍ എത്തിച്ച് രോഗനിര്‍ണ്ണയം നടത്തുകയും തുടര്‍ ചികിത്സ നടത്തുകയും ചെയ്യും.
പദ്ധതിയുമായി ബന്ധപ്പെട്ട് പ്രവര്‍ത്തിക്കുന്ന വളണ്ടിയര്‍ മാര്‍ക്കുള്ള പരിശീലനം ഇന്നും നാളെയുമായി നാല് പഞ്ചായത്തുകളില്‍ നടക്കും. വാര്‍ത്താ സമ്മേളനത്തില്‍ പൊന്നാനി ബ്ലോക്ക് പഞ്ചായത്ത് പ്രസിഡന്റ് കെ. ലക്ഷ്മി, വൈസ്. പ്രസിഡന്റ് അഡ്വ.പി.പി.മോഹന്‍ദാസ്, എം.പി.രാമദാസ്, എന്‍.ഷീജ, പി.വി.ലീല, പി.വി.സജികുമാര്‍ പങ്കെടുത്തു.