കൊട്ടാരക്കര: പുലമണിലെ ബാര്‍ഹോട്ടലിലുണ്ടായ സംഘര്‍ഷത്തില്‍ യുവാവിനു ഗുരുതരമായി മര്‍ദനമേറ്റു. കോട്ടയം കറുകച്ചാല്‍ സ്വദേശി ഹരീഷിന്(20) ആണ് ആക്രമണത്തില്‍ പരുക്കേറ്റത്. ഹരീഷിനെ അബോധാവസ്ഥയില്‍ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. മദ്യപിക്കാനെത്തിയ നാലംഗ സംഘവും ബാര്‍ ജീവനക്കാരും തമ്മിലുണ്ടായ സംഘര്‍ഷമാണ് ഏറ്റുമുട്ടലില്‍ കലാശിച്ചത്. കാറില്‍ രക്ഷപ്പെടാന്‍ ശ്രമിച്ച സംഘത്തെ ജീവനക്കാര്‍ ഹോട്ടലിന്റെ ഗേറ്റടച്ച് തടഞ്ഞു. സംഘത്തിലെ മൂന്നുപേര്‍ രക്ഷപ്പെട്ടെങ്കിലും കൈയില്‍ കിട്ടിയ ഹരീഷിനെ പത്തോളം വരുന്ന ജീവനക്കാര്‍ ക്രൂരമായി മര്‍ദിച്ചു.
പുലമണ്‍ ട്രാഫിക്കില്‍ ഡ്യൂട്ടിയിലുണ്ടായിരുന്ന പൊലിസുകാരുടെ കണ്‍മുന്നിലായിരുന്നു മര്‍ദനം. രണ്ടുപേരെ പിന്നീട് പൊലിസ് കസ്റ്റഡിയിലെടുത്തു. അബോധാവസ്ഥയിലായ ഹരീഷിനെ ആദ്യം താലൂക്ക് ആശുപത്രിയിലും പിന്നീട് മെഡിക്കല്‍ കോളജിലും പ്രവേശിപ്പിക്കുകയായിരുന്നു.