കൊല്ലം: കൈക്കൂലി ലഭിക്കുന്നതിനായി കെട്ടിട നിര്‍മാണത്തിനുള്ള പെര്‍മിറ്റിനായുള്ള അപേക്ഷകളില്‍ അനാവശ്യമായ കാലതാമസം വരുത്തുന്നതായ പരാതിയെത്തുടര്‍ന്ന് കൊല്ലം കോര്‍പറേഷന്‍, പുനലൂര്‍, കൊട്ടാരക്കര, പരവൂര്‍, കരുനാഗപ്പള്ളി മുന്‍സിപ്പാലിറ്റി ഓഫിസുകളില്‍ ഇന്നലെ വിജിലന്‍സ് മിന്നല്‍ പരിശോധന നടത്തി. വിജിലന്‍സ് ഡയറക്ടറുടെ ഉത്തരവിന്റെ അടിസ്ഥാനത്തില്‍ വിജിലന്‍സ് ദക്ഷിണമേഖല പൊലിസ് സൂപ്രണ്ട് ആര്‍. ജയശങ്കറിന്റെ നിര്‍ദേശാനുസരണം കൊല്ലം വിജിലന്‍സ് ഡെപ്യുട്ടി പൊലിസ് സൂപ്രണ്ട് കെ. അശോക്കുമാറിന്റെ മേല്‍നോട്ടത്തിലാണ് റെയ്ഡ് നടത്തിയത്. പരിശോധനയില്‍ നിരവധി ക്രമക്കേടുകള്‍ കണ്ടെത്തി.
പരിശോധനയില്‍ വിജിലന്‍സ് ഇന്‍സ്‌പെക്ടര്‍മാരായ എം.എം ജോസ്, പ്രമോദ്കൃഷ്ണന്‍, അല്‍ജബാര്‍, സുധീഷ്, രാജേഷ് എന്നിവരും അസിസ്റ്റന്റ് എഞ്ചിനിയര്‍മാരായ വിനോദ്, യേശുദാസ്, സന്തോഷ്, രഘു, പഞ്ചായത്ത് സെക്രട്ടറിമായ മനോജ്, സുനില്‍കുമാര്‍, ശിവകുമാര്‍, ജയകുമാര്‍, ജോണ്‍സണ്‍ പീറ്റര്‍ പങ്കെടുത്തു.