സംഭവം പൊലിസിന്റെ വാഹന പരിശോധനയ്ക്കിടെ

നിലമ്പൂര്‍: വാഹനപരിശോധനയ്ക്കിടെ പൊലിസുകാരന്‍ വിദ്യാര്‍ഥികള്‍ സഞ്ചരിച്ച ബൈക്ക് പിടിച്ചുനിര്‍ത്തിയതിനെ തുടര്‍ന്ന് ബൈക്ക് മറിഞ്ഞ് വിദ്യാര്‍ഥിക്കു പരുക്കേറ്റു. തൊണ്ടിയിലെ മാന്തോണി അസ്‌ലമിനാണ് (17) പരുക്കേറ്റത്.
കാല്‍പാദത്തിന്റെ എല്ല് പൊട്ടിയ അസ്‌ലമിനെ ജില്ലാ ആശുപത്രിയില്‍ പ്രവേശിപ്പിച്ചു. ഇന്നലെ രാവിലെ എട്ടരയോടെയാണ് സ്‌കൂളിലേക്കു സുഹൃത്തിന്റെ ബൈക്കിനു പിറകില്‍ സഞ്ചരിക്കവേ പരിശോധനയ്ക്കിടെ മറ്റൊരു ബൈക്കിലെത്തിയ പൊലിസുകാരന്‍ ഇവരുടെ ബൈക്ക് പിടിച്ച നിര്‍ത്താന്‍ ശ്രമിക്കുകയും പൊലിസുകാരന്റേതുള്‍പ്പെടെ രണ്ടു ബൈക്കുകളും നിലത്തുവീഴുകയുമായിരുന്നുവെന്നും പറയുന്നു. ഹെല്‍മറ്റ് വേട്ടയുടെ പേരില്‍ യാത്രക്കാരെ അപകടത്തില്‍പെടുത്തുന്ന തരത്തില്‍ നടത്തുന്ന പരിശോധന ഡി.ജി.പിയുടെ ഉത്തരവിന് വിരുദ്ധമാണ്.
അതേസമയം ബൈക്കില്‍ രണ്ടില്‍ കൂടുതല്‍ ആളുകള്‍ ഉണ്ടായിരുന്നുവെന്നും അമിത വേഗതയില്‍ വന്ന ബൈക്ക് പൊലിസുകാരന്റെ ബൈക്കിനിടിച്ചു മറിയുകയായിരുന്നുവെന്നുമാണ് പൊലിസിന്റെ വിശദീകരണം. മകന് അപടകത്തിനിട വരുത്തിയ പൊലിസുകാരനെതിരെ അസ്‌ലമിന്റെ രക്ഷിതാവ് നിലമ്പൂര്‍ സി.ഐക്ക് പരാതി നല്‍കി.