കെയ്‌റോ: ഈജിപ്തില്‍ 19 ഭീകരരെ സൈന്യം വധിച്ചു. കഴിഞ്ഞ ദിവസം ക്രിസ്ത്യന്‍ സമുദായത്തിനുനേരെയുണ്ടായ ആക്രമണത്തില്‍ പങ്കുള്ളതായി സംശയിക്കുന്ന സംഘത്തെയാണ് സൈന്യം വധിച്ചത്.
വെള്ളിയാഴ്ച മധ്യ ഈജിപ്തിലെ മിന്‍യ പ്രവിശ്യയില്‍ ക്രിസ്ത്യന്‍ വിശ്വാസികള്‍ക്കുനേരെയുണ്ടായ ആക്രമണത്തില്‍ ഏഴുപേര്‍ കൊല്ലപ്പെട്ടിരുന്നു. സംഭവത്തിന്റെ ഉത്തരവാദിത്തം ഐ.എസ് ഏറ്റെടുക്കുകയും ചെയ്തിരുന്നു.പടിഞ്ഞാറന്‍ മിന്‍യയില്‍ സര്‍ക്കാര്‍ സൈന്യവും ഭീകരരും തമ്മില്‍ മണിക്കൂറുകളോളം ഏറ്റുമുട്ടല്‍ നടന്നു. ഇതിലാണ് ഭീകരര്‍ കൊല്ലപ്പെട്ടത്. ഈജിപ്ത് ആഭ്യന്തര മന്ത്രാലയമാണു വാര്‍ത്ത പുറത്തുവിട്ടത്. സംഭവത്തിന്റെ വിശദാംശങ്ങള്‍ വെളിപ്പെടുത്താന്‍ മന്ത്രാലയം തയാറായിട്ടില്ല. ഐ.എസിന്റെ പ്രാദേശിക ഘടകം അംഗങ്ങളാണു സൈനിക നടപടിയില്‍ കൊല്ലപ്പെട്ടതെന്നാണു വിവരം.