അരീക്കോട്: പഞ്ചായത്തില്‍ ഡിഫ്തീരിയ സ്ഥിരീകരിച്ചതോടെ രോഗപ്രതിരോധ പ്രവര്‍ത്തനങ്ങള്‍ ഊര്‍ജിതപ്പെടുത്താന്‍ വിവിധ പദ്ധതികള്‍ക്ക് രൂപം നല്‍കി. അരീക്കോട് പഞ്ചായത്തിലെ ഒന്‍പതാം വാര്‍ഡ് സൗത്ത് പുത്തലം പറമ്പന്‍ ഉണ്ണികൃഷ്ണന് ഡിഫ്തീരിയ ബാധിച്ച് കഴിഞ്ഞ ദിവസം മഞ്ചേരി മെഡിക്കല്‍ കോളജില്‍ അഡ്മിറ്റ് ചെയ്തിരുന്നു. ഇതേതുടര്‍ന്ന് ആരോഗ്യ വകുപ്പിന്റെയും പഞ്ചായത്തിന്റെയും നേതൃത്വത്തില്‍ ചേര്‍ന്ന പ്രത്യേക യോഗത്തിലാണ് ആരോഗ്യ സംരക്ഷണത്തിനായി വാര്‍ഡ് തലങ്ങളില്‍ നടപ്പാക്കേണ്ട തീരുമാനങ്ങള്‍ കൈകൊണ്ടത്. വാര്‍ഡ് തലങ്ങളില്‍ രോഗപ്രതിരോധ പ്രവര്‍ത്തനങ്ങള്‍ സജീവമാക്കും. ഇതിനായി പൊതുജന പങ്കാളിത്തത്തോടെ കര്‍മസേനക്ക് രൂപം നല്‍കും. വൃത്തിഹീനമായ പ്രദേശങ്ങള്‍ കണ്ടെത്തി ശുചീകരണ പ്രവര്‍ത്തനങ്ങള്‍ നടത്തും. കര്‍മസേനയുടെ നേതൃത്വത്തില്‍ വീടുകള്‍ തോറും സ്‌ക്വാഡ് പ്രവര്‍ത്തനങ്ങള്‍ കാര്യക്ഷമമാക്കും. വീടുകള്‍ക്ക് പുറമെ ബസ് സ്റ്റാന്‍ഡ്, വഴിയോരങ്ങള്‍ എന്നിവിടങ്ങളിലും കൊതുകിനെ നശിപ്പിക്കും. ഡിഫ്തീരിയക്ക് പുറമെ നാല്‍പതോളം ഡെങ്കിപ്പനികളാണ് അരീക്കോട് താലൂക്കാശുപത്രിയില്‍ റിപ്പോര്‍ട്ട് ചെയ്തിട്ടുള്ളത്.
പ്രസിഡന്റ് അമ്പായത്തിങ്ങല്‍ മുനീറ ഉദ്ഘാടനം ചെയ്തു. വൈസ് പ്രസിഡന്റ് എ.ഡബ്ലിയു അബ്ദുറഹ്മാന്‍ അധ്യക്ഷനായി. ഹെല്‍ത്ത് ഇന്‍സ്‌പെക്ടര്‍ ഹുസൈന്‍, സ്ഥിരംസമിതിയധ്യക്ഷരായ വി.പി സുഹൈര്‍, അയ്യാടന്‍ ഷീന, സെക്രട്ടറി സി.പി സുബൈര്‍, പഞ്ചായത്തംഗങ്ങളായ അബൂബക്കര്‍ സിദ്ദീഖ്, ശിഹാബ് പാറക്കല്‍, എ.എം ശാഫി, ഉമര്‍ വെള്ളേരി, എം.ടി ഭാസ്‌കരന്‍, പി. സനാവുള്ള, ബീന, കെ.വി നിഷ, ആരോഗ്യ പ്രവര്‍ത്തകര്‍ തുടങ്ങിയവര്‍ പങ്കെടുത്തു.