തലശ്ശേരി: തോട്ടടയിലെ തേജസ് വീട്ടില്‍ പൂജാസുരേഷിന്റെ വീട്ടില്‍നിന്നും കവര്‍ച്ച നടത്തിയ 25 പവന്‍ സ്വര്‍ണ്ണാഭരണങ്ങള്‍ കണ്ടെണ്ടത്താന്‍ എടക്കാട് പൊലിസ് നടപടികള്‍ ആരംഭിച്ചു. കവര്‍ച്ചയുമായി ബന്ധപ്പെട്ട് പൊലിസ് പിടിയിലായ മീത്തലെ പുന്നാട്ടെ സനീഷ് നിവാസില്‍ സജേഷ്, മട്ടന്നൂര്‍ നന്നാടത്ത് വീട്ടില്‍ വിജേഷ് എന്നിവരെ ചോദ്യം ചെയ്തതിലൂടെ കവര്‍ച്ച ചെയ്ത സ്വര്‍ണ്ണാഭരണങ്ങള്‍ തൃശിനാപള്ളിയിലെ ജ്വല്ലറികളില്‍ വില്‍പന നടത്തിയതായി വിവരം ലഭിച്ചു.
കഴിഞ്ഞ മാര്‍ച്ച് 31 നാണ് കവര്‍ച്ച നടത്തിയത്. 25 പവന്‍ സ്വര്‍ണ്ണാഭരണത്തിന് പുറമെ നാല്‍പതിനായിരം രൂപയും പ്രതികള്‍ കവര്‍ച്ച ചെയ്തിരുന്നു. മഴ ആരംഭിച്ചതോടെ മോഷണ ശ്രമങ്ങള്‍ നഗരപരിസരത്ത് സജീവമാണ്. ഈ കഴിഞ്ഞദിവസം ധര്‍മ്മടം പൊലിസ് സ്റ്റേഷന്‍ പരിധിയില്‍ കൊടുവള്ളി ചിറക്കക്കാവിനടുത്ത് പര്‍ദ്ദ ധരിച്ചെത്തിയ രണ്ടംഗസംഗത്തെ നാട്ടുകാര്‍ പിടികൂടിയിരുന്നു.തുടര്‍ന്ന് പരിശോധിച്ചപ്പോഴാണ് എത്തിയവര്‍ പുരുഷന്‍മാരാണെന്ന് മനസിലായത്്.