കൊട്ടിയം: ദേശീയ പാതയില്‍ ഇത്തിക്കരയ്ക്കും സ്റ്റാന്‍ഡേര്‍ഡ് ജങ്ഷനും ഇടയ്ക്കുളള വളവില്‍ നിര്‍മിക്കുന്ന ഓടയുടെ നിര്‍മാണ പ്രവര്‍ത്തനങ്ങള്‍ നിര്‍ത്തി വയ്ക്കണമെന്ന് ആവശ്യപ്പെട്ട് ആര്‍.വൈ.എഫ് ചാത്തന്നൂര്‍ മണ്ഡലം കമ്മിറ്റിയുടെ നേതൃത്വത്തില്‍ പ്രതിഷേധ കൂട്ടായ്മ നടത്തി. ദേശീപാത നാലുവരി ആക്കുന്നതിന്റെ പ്രവര്‍ത്തനങ്ങള്‍ നടന്നു വരുന്ന സാഹചര്യത്തില്‍ കോടിക്കണക്കിന് രൂപ ചിലവാക്കി നിര്‍മിക്കുന്ന ഓട അപ്രസക്തമാകുമെന്നും ഇപ്പോള്‍ നടക്കുന്ന നിര്‍മാണ പ്രവര്‍ത്തനങ്ങള്‍ ഉദ്യോഗസ്ഥ കരാര്‍ മാഫിയയുടെ നേതൃത്വത്തില്‍ നടക്കുന്ന അഴിമതിയുടേയു ധൂര്‍ത്തിന്റയും പ്രത്യക്ഷതെളിവാണെന്നും ധര്‍ണ ഉദ്ഘാടനം ചെയ്തു ആര്‍.വൈ.എഫ് സംസ്ഥാന കമ്മിറ്റി അംഗം പ്ലാക്കാട് ടിങ്കു പറഞ്ഞു. മണ്ഡലം പ്രസിഡന്റ് ഷാലു വി ദാസ് അധ്യക്ഷനായി. ബിനു സോമന്‍, ഷൈനാസ് കെ.എസ്, ഹുസൈന്‍, സുധീഷ് എസ് , യദുകൃഷ്ണന്‍ എന്നിവര്‍ സംസാരിച്ചു.