മക്ക: പരിശുദ്ധ ഹജ്ജ് കര്‍മ്മത്തിനെത്തുന്ന ഹാജിമാര്‍ക്ക് സാന്ത്വനമായി ഇത്തവണയും മക്കയിലും മദീനയിലും വിഖായ ഹജ്ജ് വളണ്ടിയര്‍മാര്‍ കര്‍മരംഗത്ത്. കഴിഞ്ഞവര്‍ഷം ആദ്യമായി ഹാജിമാരുടെ സേവനത്തിനിറങ്ങുകയും സ്വദേശികളുടെയും വിദേശികളുടെയും സഊദി മന്ത്രാലയങ്ങളുടെയും പ്രശംസ പിടിച്ചു പറ്റിയ ചാരിതാര്‍ഥ്യത്തോടെയാണ് ഇത്തവണ വിഖായ ഹജ്ജ് വളണ്ടിയര്‍ സംഘം കര്‍മരംഗത്തിറങ്ങുന്നത്.

മക്കയില്‍ സമസ്ത കേരള ഇസ്‌ലാമിക് സെന്ററിന്റെ (എസ്.കെ.ഐ.സി) കീഴിലാണ് വിഖായ സന്നദ്ധ പ്രവര്‍ത്തകര്‍ രംഗത്തിറങ്ങുക. ഇതിനായി സഊദിയുടെ വിവിധ ഭാഗങ്ങളില്‍ നിന്നുള്ള എസ്.കെ.ഐ.സി യൂനിറ്റുകളില്‍ നിന്നുള്ള ഏകദേശം അഞ്ഞൂറിലധികം വിഖായ പ്രവര്‍ത്തകര്‍ ഇതിനായി ഒരുങ്ങിക്കഴിഞ്ഞു.

മക്കയില്‍ പ്രധാനപ്പെട്ട ഭാഗങ്ങള്‍ കേന്ദ്രീകരിച്ചു വിവിധ ഗ്രൂപ്പുകളിലായി ഇവര്‍ പ്രവര്‍ത്തനനിരതരാവും. കൂടാതെ വളരെ തിരക്കേറുന്ന സന്ദര്‍ഭങ്ങളില്‍ ഹറം പള്ളിയുടെ വാതിലുകളിലും മറ്റു ആവശ്യമായ സ്ഥലങ്ങളിലും വഴിതെറ്റുന്ന ഹാജിമാരെ സ്ഥാനത്ത് എത്തിക്കുവാനും സഹായിക്കുവാനുമായി വിഖായ കര്‍മഭടന്മാര്‍ രംഗത്തുണ്ടാവും.

കഴിഞ്ഞ വര്‍ഷം അപ്രതീക്ഷിതമായെത്തിയ ഹറം ക്രെയിന്‍ ദുരന്തം, മിന ദുരന്തം എന്നിവിടങ്ങളില്‍ വിഖായ വളണ്ടിയര്‍മാരുടെ നിസ്വാര്‍ഥ സേവനങ്ങള്‍ ഏറെ പ്രശംസ നേടിയിരുന്നു. ഇതേത്തുടര്‍ന്ന്, മന്ത്രാലയങ്ങളില്‍ നിന്ന് അനുമോദനപത്രവും വളണ്ടിയര്‍മാരെ തേടിയെത്തിയിരുന്നു.
സേവനം തുടങ്ങി ആദ്യ വര്‍ഷം തന്നെ ഇത്തരത്തില്‍ അനുമോദന പത്രം ലഭിച്ചത് പ്രവര്‍ത്തകര്‍ക്ക് ഏറെ ആവേശമാണ് സമ്മാനിച്ചത്. അതേസമയം മദീനയില്‍ ഇത്തവണയും ഹജ്ജ് വെല്‍ഫയര്‍ ഫോറത്തിന്റെ കീഴിലാണ് വിഖായ വളണ്ടിയര്‍മാര്‍ രംഗത്തിറങ്ങുന്നത്. എസ്.കെ.ഐ.സി നാഷണല്‍ കമ്മിറ്റിയുടെ നേതൃത്വത്തില്‍ സുബൈര്‍ ഹുദവി, ഒമാനൂര്‍ അബ്ദുറഹ്്മാന്‍ മൗലവി എന്നിവരുടെ നേതൃത്വത്തിലാണ് വിഖായ പ്രവര്‍ത്തനത്തിനൊരുങ്ങുന്നത്.