പത്തനംതിട്ട: വിവാദ പ്രസംഗം നടത്തി പെട്ടതോടെ മാധ്യമപ്രവര്‍ത്തകരില്‍ കുറ്റംചാര്‍ത്തി ബി.ജെ.പി അധ്യക്ഷന്‍ ശ്രീധരന്‍പിള്ള. ശബ്ദരേഖ പുറത്തുവിട്ടത് സ്വതന്ത്ര മാധ്യമപ്രവര്‍ത്തനത്തോടുള്ള ദ്രോഹമാണെന്ന് അദ്ദേഹം പറഞ്ഞു. 

യുവമോര്‍ച്ച യോഗത്തില്‍ രഹസ്യങ്ങളൊന്നും ഉണ്ടായിരുന്നില്ല. അത് ബി.ജെ.പിയുടെ ഫേസ്ബുക്ക് പോസ്റ്റിലൂടെ ലൈവായി പുറത്തുവിട്ടിരുന്നു. അതാണ് ഇപ്പോഴെന്തോ വലിയ കാര്യം കണ്ടുപിടിച്ചെന്ന മട്ടില്‍ പ്രചരിക്കുന്നത്. ഇതില്‍ ഗൂഢാലോനയുണ്ടെന്നും അദ്ദേഹം ആരോപിച്ചു.

മാധ്യമപ്രവര്‍ത്തകര്‍ക്കിടയില്‍ സി.പി.എം ഫ്രാക്ഷന്‍ ഉണ്ട്. മാധ്യമസ്ഥാപനങ്ങള്‍ തന്നെയാണ് ഇക്കാര്യം തന്നോട് പറഞ്ഞതെന്നും ശ്രീധരന്‍പിള്ള ആരോപിച്ചു.

പ്രവര്‍ത്തകരെ ഉത്തേജിപ്പിക്കാന്‍ നടത്തിയ പ്രസംഗമാണിത്. അതില്‍ അപാകതയൊന്നുമില്ല. പറഞ്ഞതില്‍ ഉറച്ചുനില്‍ക്കുന്നു. സുവര്‍ണാവസരം എന്നു താന്‍ പ്രയോഗിച്ചത് ജനസേവനത്തിനുള്ള സുവര്‍ണാവസരമാണെന്ന തരത്തിലാണ്.

പാര്‍ട്ടി വ്യത്യാസങ്ങളില്ലാതെ നേതാക്കള്‍ നിയമോപദേശത്തിന് തന്നെ സമീപിച്ചിരുന്നു. ടി.പി ചന്ദ്രശേഖരന്‍ വധക്കേസില്‍ പോലും തന്റെ നിയമോപദേശം സ്വീകരിച്ചവരുണ്ടെന്നും ശ്രീധരന്‍പിള്ള വ്യക്തമാക്കി. അഭിഭാഷകന്‍ എന്ന നിലയിലാണ് ഇതെല്ലാം ചെയ്തത്. അതുകൊണ്ട് തന്ത്രിയ്ക്ക് നിയമോപദേശം നല്‍കിയതില്‍ തെറ്റൊന്നുമില്ലെന്നും ശ്രീധരന്‍പിള്ള പറഞ്ഞു.