കോഴിക്കോട്: സര്‍ക്കാര്‍ സര്‍വിസില്‍ ജോലി ചെയ്യുന്ന ഉദ്യോഗസ്ഥര്‍ തങ്ങളുടെ സമൂഹത്തില്‍ പൊതുനന്മകള്‍ പകര്‍ന്നു നല്‍കണമെന്ന് സമസ്ത കേരള ജംഇയത്തുല്‍ ഉലമ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍. കോഴിക്കോട് സുപ്രഭാതം ഓഡിറ്റോറിയത്തില്‍ നടന്ന സമസ്ത കേരള മുസ്‌ലിം എംപ്ലോയീസ് അസോസിയേഷന്‍ (എസ്.കെ.എം.ഇ.എ) സംസ്ഥാന പ്രതിനിധി സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
സര്‍ക്കാര്‍ സര്‍വിസിലെ ഡോക്ടര്‍മാരും നിയമ വിദഗ്ധരും അധ്യാപകരുമടക്കമുള്ള ഉന്നത ഉദ്യോഗസ്ഥരും ഉള്‍പ്പെടുന്ന എസ്.കെ.എം.ഇ.എ സമസ്തക്കു വലിയ മുതല്‍കൂട്ടാണ്. ഏതു രംഗത്ത് ജോലി ചെയ്യുന്നവരായാലും തങ്ങളുടെ കര്‍ത്തവ്യങ്ങള്‍ക്കപ്പുറം ആത്മാര്‍ഥതയോടെയുള്ള സമൂഹിക സേവനവും നടത്തണമെന്നും തങ്ങള്‍ പറഞ്ഞു.
രാജ്യപുരോഗതിക്കും സമൂഹനന്മക്കും ഉദ്യോഗസ്ഥരുടെ പ്രവര്‍ത്തനങ്ങള്‍ സഹായകരമാകണമെന്ന് മുഖ്യപ്രഭാഷണം നടത്തിയ സമസ്ത ജംഇയ്യത്തുല്‍ ഉലമ ജനറല്‍ സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍ പറഞ്ഞു. ഉദ്യോഗസ്ഥ ജീവിതം മനുഷ്യര്‍ക്കും മറ്റു ജീവജാലങ്ങള്‍ക്കും പ്രകൃതിക്കും ഉപകാരപ്രദമാവുമ്പോള്‍ അവര്‍ക്ക് ആദരവുകള്‍ സ്വാഭാവികമായും ലഭിക്കുമെന്നും ആലിക്കുട്ടി മുസ്‌ലിയാര്‍ അഭിപ്രായപ്പെട്ടു.
എസ്.കെ.എം.ഇ.എസംസ്ഥാന പ്രസിഡന്റ് ഡോ. എന്‍.എ.എം അബ്ദുല്‍ ഖാദര്‍ അധ്യക്ഷനായി. അറബി ഭാഷാ സാഹിത്യത്തില്‍ വിലപ്പെട്ട സംഭാവനകളര്‍പ്പിച്ച് രാഷ്ട്രപതിയുടെ അവാര്‍ഡിന് അര്‍ഹനായ ഡോ. എന്‍.എ.എം അബ്ദുല്‍ ഖാദറിന് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ഉപഹാരം സമര്‍പ്പിച്ചു.
വിവിധ മേഖലകളില്‍ അവാര്‍ഡിന് അര്‍ഹരായ അമാന്‍ അബ്ദുറഹ്മാന്‍, അഡ്വ. മുഹമ്മദ് തയ്യിബ് ഹുദവി എന്നിവരും തങ്ങളില്‍ നിന്ന് ഉപഹാരം ഏറ്റുവാങ്ങി. എസ്.കെ.എം.ഇ.എ സംസ്ഥാന ജനറല്‍ സെക്രട്ടറി മുസ്തഫ മുണ്ടുപാറ സ്വാഗതം പറഞ്ഞു. കെ. മോയിന്‍കുട്ടി മാസ്റ്റര്‍, ഉമര്‍ ഫൈസി മുക്കം, നാസര്‍ ഫൈസി കൂടത്തായി, പ്രൊഫ. ഒമാനൂര്‍ മുഹമ്മദ്, ഡോ. നാട്ടിക മുഹമ്മദലി സംസാരിച്ചു.