ഗസ്സയിലും ലബനാനിലും കൂട്ടക്കുരുതി തുടര്‍ന്ന് ഇസ്‌റാഈല്‍. കഴിഞ്ഞ 24 മണിക്കൂറിനിടെ ഫലസ്തീനില്‍ 44 പേരെ കൊന്നൊടുക്കിയതായാണ് റിപ്പോര്‍ട്ട്. ലബനാനില്‍ കഴിഞ്ഞ ദിവസം നടത്തിയ ആക്രമണങ്ങളില്‍ 31 പേരും കൊല്ലപ്പെട്ടു. രക്ഷാ പ്രവര്‍ത്തകരാണ് ലബനാനില്‍ കൊല്ലപ്പെട്ടവരില്‍ ആറു പേര്‍. മോചിപ്പിക്കപ്പെട്ട മണിക്കൂറുക്കകം ആക്രമണങ്ങളില്‍ കൊല്ലപ്പെട്ടവരാണ് മൂന്ന് ഫലസ്തീനികള്‍. 

അതിനിടെ, ഗസ്സയില്‍ വെടിനിര്‍ത്തല്‍ ചര്‍ച്ചകളില്‍ നിന്നും പിന്‍വാങ്ങിയെന്ന വാര്‍ത്തകള്‍ നിഷേധിച്ച് ഖത്തര്‍ രംഗത്തെത്തി. പുറത്തു വരുന്ന വാര്‍ത്തകള്‍ കൃത്യമല്ലെന്ന് ഖത്തര്‍ വിദേശകാര്യ മന്ത്രാലയം അറിയിച്ചു. ഇസ്‌റാഈലും ഹമാസും തമ്മിലെ മധ്യസ്ഥ ശ്രമങ്ങള്‍ താല്‍കാലികമായി തടസ്സപ്പെട്ടു നില്‍ക്കുകയാണെങ്കിലും ഇരു കക്ഷികളും ആത്മാര്‍ഥമായി സന്നദ്ധത അറിയിച്ചാല്‍ ചര്‍ച്ചകള്‍ തുടരുമെന്ന് ഖത്തര്‍വിദേശകര്യ വക്താവ് മാജിദ് അല്‍ അന്‍സാരി ശനിയാഴ്ച രാത്രിയില്‍ പങ്കുവെച്ച പ്രസ്താവനയിലൂടെ വ്യക്തമാക്കി.