കല്ലമ്പലം: കാണാതായ യുവാവിന്റെ മൃതദേഹമാണ് വാമനാപുരം നദിയില്‍ കണ്ടതെന്ന സംശയത്തില്‍ പൊലിസ്. എന്നാല്‍ ഡി.എന്‍.എ ടെസ്റ്റ് ഫലം വന്നാല്‍ മാത്രമേ സ്ഥിരീകരിക്കാനാകു എന്നും പൊലിസ് അറിയിച്ചു.
കഴിഞ്ഞ മാസം 31 നാണ് ആറ്റിങ്ങല്‍ രാമച്ചംവിള ശിവസദനത്തില്‍ കൃഷ്ണന്‍ കുട്ടിയുടെ മകന്‍ കിരണ്‍ കൃഷ്ണ (18) രാത്രി 12 മണിയോടെ വീട്ടില്‍ നിന്നും ബൈക്കുമായി പോയത്. പിന്നീട് കിരണിനെ കാണ്‍മാനില്ലെന്ന് കാട്ടി സഹോദരന്‍ പൊലിസില്‍ പരാതി നല്‍കിയിരുന്നു. ഈ മാസം മൂന്നിനാണ് ആറ്റിങ്ങല്‍ കൊട്ടിയോടു ക്ലബിന് സമീപം വാമനാപുരം നദിയില്‍ പുരുഷന്റെ മൃതദേഹം കണ്ടെത്തിയത്. കഴിഞ്ഞ ദിവസം പൊലിസ് കിരണിന്റെ ബൈക്ക് കണ്ടെത്തിയിരുന്നു. പൂവന്‍പാറ പാലത്തിലെ സി.സി.ടി.വി പരിശോധിച്ച പൊലിസ് ഗുരുനാഗപ്പന്‍ കാവ് സ്വദേശി ബിനു. ആര്‍ പൂവന്‍പാറ പാലത്തിന് സമീപത്തു നിന്ന് ബൈക്ക് മോഷ്ടിച്ചതാണെന്ന് കണ്ടെത്തി. തുടര്‍ന്ന് ബിനുവിനെ പിടികൂടി ചോദ്യം ചെയ്തപ്പോള്‍ ബൈക്ക് ഇരുന്ന സ്ഥലം പൊലിസിന് കാട്ടിക്കൊടുക്കുകയായിരുന്നു. സി.സി.ടി.വി ദൃശ്യവും മുടിയുടെ നീളവും പരിശോധിച്ച പൊലിസ് ഏതാണ്ട് ഉറപ്പിച്ച മട്ടാണ്. മൃതദേഹം പോസ്റ്റ്‌മോര്‍ട്ടത്തിനു ശേഷം മെഡിക്കല്‍ കോളജ് മോര്‍ച്ചറിയില്‍ സൂക്ഷിച്ചിരിക്കുകയാണ്. എന്നാല്‍ ശാസ്ത്രീയ പരിശോധനയിലൂടെ മാത്രമേ സ്ഥിരീകരിക്കാനാകൂ എന്നാണ് പൊലിസിന്റെ നിലപാട്. ഡി.എന്‍.എ ടെസ്റ്റ് ഫലം രണ്ട് ദിവസത്തിനുള്ളില്‍ അറിയാന്‍ കഴിയുമെന്നും പൊലിസ് അറിയിച്ചു.