കൊല്ലം: കരുനാഗപ്പള്ളി റേഞ്ചി വന്‍ വ്യാജമദ്യവേട്ട. രാത്രിയില്‍ നടത്തിയ വാഹനപരിശോധനയിലാണ് രണ്ട് ആഡംബര കാറുകളിലായി 82 കുപ്പി വ്യാജമദ്യവുമായി കരുനാഗപ്പള്ളി കൊല്ലക സ്വദേശികളായ വടക്കുപുറത്തു വീട്ടില്‍ ജോബിന്‍ ജെ തോമസ്(25) കനക ഭവനം വീട്ടില്‍ അഖില്‍ കനകന്‍ (24) എന്നിവരെ കരുനാഗപ്പള്ളി എക്‌സൈസ് റേഞ്ച് ഇന്‍സ്പെക്ടര്‍ എ. ജോസ്പ്രതാപിന്റെ നേതൃത്വത്തിലുള്ള സംഘം ലാലാജി ജംഗ്ഷനു സമീപത്തുവച്ച് അറസ്റ്റ് ചെയ്തത്.

എക്‌സൈസ് ഉദ്യോഗസ്ഥരെ കണ്ട് ചിതറി ഓടിയ കഞ്ചാവ് മാഫിയയെ അന്വേഷിച്ച് വാഹനപരിശോധന നടത്തി വരവേ ആണ് പുലര്‍ച്ചെ ലാലാജി ജംഗ്ഷനു സമീപം രണ്ട് കാറുകള്‍ സംശയാസ്പദമായ സാഹചര്യത്തില്‍ കണ്ടത്. തുടര്‍ന്ന് വിശദമായി പരിശോധിച്ചതില്‍ കരുനാഗപ്പള്ളി ടൗണിലെ 'നീമാരുടെ ജ്യൂസ് കട' നടത്തിപ്പുകാരായ ജോബിന്‍ ജെ തോമസ്, അഖില്‍ എന്നിവരെ രണ്ടു കാറില്‍ നിന്നായി 82 കുപ്പി മുന്തിയ ഇനം വ്യാജ മദ്യവുമായി പിടികൂടുകയായിരുന്നു.

രണ്ടു ദിവസം മുന്‍പ് ഇവരുള്‍പ്പെടെ ഉള്‍പ്പെടെ ആറു പേര്‍ മാഹിയില്‍ പോയി രണ്ടു കാറുകളിലായി ഒരു ലക്ഷത്തിലധികം രൂപ മുടക്കി വാങ്ങിയ മദ്യത്തില്‍ ബാക്കിയായതാണ് പിടിയിലായത്. ഓണത്തിന് ഇവര്‍ ലക്ഷകണക്കിന് രൂപയുടെ മദ്യം വിറ്റതായി തെളിവ് ലഭിച്ചു. കോടതിയില്‍ ഹാജരാക്കിയ പ്രതികളെ കരുനാഗപ്പള്ളി ജുഡിഷ്യല്‍ ഫസ്റ്റ് ക്ലാസ്സ് മജിസ്ട്രേറ്റ് രേഖ ലോറൈന്‍ റിമാന്‍ഡ് ചെയ്തു.