തിരൂര്‍: ഓട്ടോറിക്ഷാ മീറ്ററിന് വ്യാജ സീലും ലെറ്റര്‍ പാഡ് ഉള്‍പ്പെടെയുള്ള രേഖകളും തയാറാക്കി നല്‍കിയെന്ന പരാതിയില്‍ പയ്യോളി സ്വദേശി അറസ്റ്റില്‍. വടകര പയ്യോളി സ്വദേശി സജീവ് (52) ആണ് തിരൂരില്‍ അറസ്റ്റിലായത്. തിരൂര്‍ താഴെപ്പാലത്ത് മുറിയെടുത്ത് മഞ്ചേരിയിലെ അംഗീകൃത സ്ഥാപനമായ കൈരളി മീറ്റര്‍ സെയില്‍സില്‍ പേരില്‍ വ്യാജമായി സീലും രേഖകളും തയാറാക്കി നല്‍കിയെന്ന പരാതിയിലാണ് അറസ്റ്റ്.
മഞ്ചേരിയിലെ കൈരളി മീറ്റര്‍ സെയില്‍സ് സ്ഥാപന ഉടമ മഞ്ചേരി ആമയൂര്‍ സ്വദേശി റഫീഖിന്റെ പരാതിയെ തുടര്‍ന്നാണ് തിരൂര്‍ എസ്.ഐ സുമേഷ് സുധാകറിന്റെ നേതൃത്വത്തിലുള്ള പൊലിസ് പ്രതിയെ അറസ്റ്റ് ചെയ്തത്. ലീഗല്‍ മെട്രോളജി ഓഫിസ് ജീവനക്കാര്‍ക്ക് സംശയം തോന്നിയതിനെ തുടര്‍ന്ന് കൈരളി മീറ്റര്‍ സെയില്‍സ് സ്ഥാപന ഉടമയെ വിവരമറിയിക്കുകയായിരുന്നുവെന്നും മഞ്ചേരി പൊലിസില്‍ നല്‍കിയ പരാതി പ്രകാരം അന്വേഷണം നടത്തി സജീവിനെ കസ്റ്റഡിയിലെടുക്കുകയുമായിരുന്നുവെന്ന് എസ്.ഐ പറഞ്ഞു. ഇയാളില്‍ നിന്ന് വ്യാജ സീലും ലെറ്റര്‍ പാഡും കണ്ടെടുത്തിട്ടുണ്ട്. ഒരു വര്‍ഷത്തോളമായി പ്രതി തിരൂര്‍ കേന്ദ്രീകരിച്ച് ഓട്ടോറിക്ഷകള്‍ക്ക് വ്യാജമായി മീറ്റര്‍ സീല്‍ തയാറാക്കി കൊടുക്കുകയായിരുന്നുവെന്നാണ് പൊലിസ് പറയുന്നത്.
ലീഗല്‍ മെട്രോളി ഓഫിസിന്റെ സീലും വ്യാജമായി ഉപയോഗിച്ചിരുന്നതായും വ്യക്തമായിട്ടുണ്ട്. തിരൂരിലെ മൂന്ന് ഓട്ടോകളില്‍ ഇതിനകം വ്യാജ സീല്‍ മീറ്റര്‍ കണ്ടെത്തിയിട്ടുണ്ട്. ഇതിലധികം ഓട്ടോകളില്‍ വ്യാജ മീറ്റര്‍ സീല്‍ ഉണ്ടാകുമെന്നാണ് പ്രാഥമിക നിഗമനം. മീറ്റര്‍ സീലും അനുബന്ധ രേഖകളും തയാറാക്കി നല്‍കുന്നതിന് 1100 രൂപ വീതമാണ് സജീവ് ഈടാക്കിയിരുന്നത്. വ്യാജ മീറ്റര്‍ സീല്‍ നിര്‍മാണത്തിന് പുറമെ നികുതി വെട്ടിപ്പിനും ഇയാള്‍ക്കെതിരെ കേസെടുത്തിട്ടുണ്ടെന്ന് എസ്.ഐ പറഞ്ഞു.