കോഴിക്കോട്: നെല്ലിക്കോട്ട് സഹോദരനെ കുത്തിക്കൊലപ്പെടുത്തിയ കേസില്‍ അറസ്റ്റിലായ സഹോദരനെ പൊലിസ് വൈദ്യപരിശോധനയ്ക്കു വിധേയനാക്കി.
നെല്ലിക്കോട് നാരകത്ത് ചെറോക്കരത്താഴം പരേതനായ വിശ്വന്റെ മകന്‍ ബിബീഷിനെ കൊലപ്പെടുത്തിയ കേസിലാണു സഹോദരന്‍ വിജീഷിന്റെ അറസ്റ്റ് രേഖപ്പെടുത്തിയ ശേഷം പൊലിസ് വൈദ്യ പരിശോധനയ്ക്കു വിധേയനാക്കിയത്.
കഴിഞ്ഞദിവസം രാത്രി 10.30നായിരുന്നു മാനസികാസ്വാസ്ഥ്യമുള്ള വിജീഷ് ബിജീഷിനെ കുത്തിക്കൊലപ്പെടുത്തിയത്. മാതാവ് രാജശ്രീയുടെ മുന്നില്‍വച്ചായിരുന്നു കുത്തിയത്. വിജീഷും ബിജീഷും വാക്കുതര്‍ക്കം പതിവായിരുന്നു.
കഴിഞ്ഞദിവസവും തര്‍ക്കം മൂത്തപ്പോള്‍ മാതാവ് പിടിച്ചുമാറ്റാന്‍ ശ്രമിച്ചെങ്കിലും ഇതിനിടെ വിജീഷ് കത്തിയെടുത്ത് കുത്തുകയായിരുന്നു. കോഴിക്കോട് മെഡിക്കല്‍ കോളജിലെത്തിച്ചെങ്കിലും രക്ഷിക്കാനായില്ല. ഇന്നലെ ഉച്ചയോടെ മാവൂര്‍ റോഡ് ശ്മശാനത്തില്‍ സംസ്‌കാരം നടത്തി. പ്രതിയെ ഇന്നു കോടതിയില്‍ ഹാജരാക്കുമെന്ന് മെഡിക്കല്‍ കോളജ് പൊലിസ് അറിയിച്ചു.