മുത്തങ്ങ: അതിവര്‍ഷത്തില്‍ കൃഷി നശിച്ചിട്ടും വീണ്ടും കൃഷിയിറക്കിയ യുവകര്‍ഷകന്റെ പ്രതീക്ഷകള്‍ തകിടം മറിച്ച് കാട്ടാന. മുത്തങ്ങ പുല്ലുറമ്മല്‍ റഫീഖിന്റെ ആറേക്കര്‍ നെല്‍കൃഷിയാണ് കാട്ടാന നശിപ്പച്ചത്.
മുത്തങ്ങ തെക്കുറുവയലില്‍ ആറേക്കര്‍ പാടത്താണ് റഫീഖ് കൃഷിയിറക്കിയത്. എന്നാല്‍ സമീപത്തെ വനത്തില്‍ നിന്ന് നിരന്തരം കൃഷിയിടത്തിലെത്തുന്ന കാട്ടാന കൃഷി പൂര്‍ണമായും ചവിട്ടി നശിപ്പിച്ചു. മൂന്ന് ലെയര്‍ ഫെന്‍സിങും കിടങ്ങും മറികടന്നാണ് ആന കൃഷിയിടത്തില്‍ എത്തി നെല്‍ച്ചെടികള്‍ തിന്നും ചവിട്ടിമെതിച്ചും നശിപ്പിച്ചത്. കാവല്‍ കിടന്നിട്ടും കാര്യമുണ്ടായില്ലന്ന് റഫീഖ് പറയുന്നു. ലീസ് ഭൂമിയായതിനാല്‍ വനം വകുപ്പിന്റെ പക്കല്‍ നിന്നും നഷ്ടപരിഹാരവും ലഭിക്കില്ല. രണ്ട് തവണയായി നെല്‍കൃഷിയിറക്കിയതില്‍ റഫീഖിന് ഒരു ലക്ഷത്തോളം രൂപയാണ് ചെലവായത്. നെല്‍കൃഷി പ്രോല്‍സാഹിപ്പിക്കുനുള്ള സര്‍ക്കാര്‍ പദ്ധതികള്‍ ഉള്‍പ്പെടുത്തി നഷ്ടപരിഹാരം നല്‍കണമെന്നാണ് റഫീഖിന്റെ ആവശ്യം.