കൊണ്ടോട്ടി: സംസ്ഥാന ഹജ്ജ് കമ്മിറ്റിക്ക് കീഴില്‍ ഹജ്ജിന് പോകുന്ന തീര്‍ഥാടകര്‍ക്ക് മാത്രം വിമാന ടിക്കറ്റിന്മേല്‍ 18 ശതമാനം ജി.എസ്.ടി. ഇന്ത്യയില്‍ വിദേശ യാത്രക്കാര്‍ക്കുള്ള മുഴുവന്‍ വിമാന ടിക്കറ്റിന്മേലും അഞ്ചുശതമാനം മാത്രം ജി.എസ്.ടി ഈടാക്കുമ്പോഴാണ് സര്‍ക്കാര്‍ മുഖേന ഹജ്ജിന് പോകുന്ന തീര്‍ഥാടകര്‍ക്ക് മാത്രം വിമാന ടിക്കറ്റിന്മേല്‍ 13 ശതമാനം അധിക ജി.എസ്.ടി ഈടാക്കുന്നത്.
കഴിഞ്ഞ വര്‍ഷം നെടുമ്പാശ്ശേരിയില്‍നിന്ന് വിമാന ടിക്കറ്റിന്മേല്‍ മാത്രം 11,757 രൂപയാണ് ജി.എസ്.ടി ഈടാക്കിയത്. നെടുമ്പാശ്ശേരിയില്‍നിന്ന് വിമാന ടിക്കറ്റ് നിരക്കായി 65,318.83 രൂപയാണ് ഈടാക്കിയത്.
ഇതില്‍ 18 ശതമാനം ജി.എസ്.ടിയും എയര്‍പോര്‍ട്ട് നിരക്കായ 3572 രൂപയും ചേര്‍ത്താണ് കഴിഞ്ഞ വര്‍ഷത്തെ ഹജ്ജ് വിമാന നിരക്കായി 80,648 രൂപ വാങ്ങിയത്.
65,000 മുതല്‍ 1,13,226 വരെയാണ് ഇന്ത്യയില്‍ നിന്നുള്ള കഴിഞ്ഞ വര്‍ഷത്തെ വിമാന ടിക്കറ്റ് നിരക്ക്. ഇന്ത്യയില്‍ വിദേശ യാത്ര ചെയ്യുന്ന വിമാന ടിക്കറ്റുകള്‍ക്കെല്ലാം അഞ്ച് ശതമാനം ജി.എസ്.ടി നല്‍കിയാല്‍മതി. ഈ ഗണത്തിലാണ് സ്വകാര്യ ഗ്രൂപ്പുകളും ഉള്‍പ്പെടുന്നത്. ആയതിനാല്‍ സ്വകാര്യ ഗ്രൂപ്പുകളില്‍ ഹജ്ജിന് പോകുന്നവര്‍ക്കും വിമാന നിരക്കില്‍ അഞ്ച് ശതമാനം ജി.എസ്.ടി നിരക്ക് നല്‍കിയാല്‍ മതി.
ജി.എസ്.ടി പൂര്‍ണമായും എടുത്തുകളയുകയോ സാധാരണ യാത്രക്കാരില്‍ നിന്ന് ഈടാക്കുന്നത് പോലെ അഞ്ച് ശതമാനമാക്കി കുറക്കുകയോ വേണമെന്ന് ആവശ്യപ്പെട്ട് സംസ്ഥാന ഹജ്ജ് കമ്മിറ്റി ചെയര്‍മാന്‍ മന്ത്രി ഡോ.തോമസ് ഐസക്കിന് നിവേദനം നല്‍കി.വേണ്ട നടപടികള്‍ കൈകൊള്ളാമെന്ന് മന്ത്രി ഉറപ്പ് നല്‍കിയതായി ചെയര്‍മാന്‍ പറഞ്ഞു.