എടക്കര: അന്യസംസ്ഥാനപാതയായ കെ.എന്‍.ജി റോഡില്‍  മൊബൈല്‍ ഫോണ്‍ കമ്പനികളുടെ കേബിള്‍ ലൈന്‍ സ്ഥാപിക്കുന്നതിന് വേണ്ടി  കുഴിയെടുത്തതില്‍ വാഹനങ്ങള്‍ മറിഞ്ഞ് അപകടം സംഭവിക്കുന്നത് പതിവാകുന്നു. കഴിഞ്ഞ ദിവസം മണി മൂളിക്ക് സമീപം ചരക്കുലോറി മറിഞ്ഞിരുന്നു. ഇന്നലെ ഉച്ചക്കാണ് സംഭവം. ലോറി ജീവനക്കാര്‍  നിസാര പരുക്കുകളോടെ രക്ഷപ്പെട്ടു. പാലത്തിങ്കല്‍ മുതല്‍ കെട്ടുക വരെയുള്ള സ്ഥലത്ത് നിരവധി  കുഴികളാണുള്ളത്. മുണ്ടയിലും, പാലാടും, വഴിക്കടവിലും നിരവധി വാഹനങ്ങള്‍ കുഴിയില്‍  ചാടുന്നുണ്ട്. പണി പൂര്‍ത്തിയാക്കി കുഴിമണ്ണിട്ട് മൂടുക മാത്രമാണ് ചെയ്തത്. ഇതിനാല്‍ മഴ പെയ്യുന്നതോടെ മണ്ണ് താഴ്ന്ന് കുഴി രൂപാന്തരപ്പെടുകയാണ്.