കോഴിക്കോട്: കേരള സ്റ്റേറ്റ് എക്‌സൈസ് സ്റ്റാഫ് അസോസിയേഷന്‍ സംസ്ഥാന സമ്മേളനം ആറ്, ഏഴ് തിയതികളില്‍ കോഴിക്കോട് സൗത്ത് ബീച്ചിലെ ഗുജറാത്തി ഓഡിറ്റോറിയത്തില്‍ നടക്കും.
ആറിന് രാവിലെ പത്തുമണിക്ക് എക്‌സൈസ് വകുപ്പ് മന്ത്രി ടി.പി രാമകൃഷ്ണന്‍ പ്രതിനിധി സമ്മേളനം ഉദ്ഘാടനം ചെയ്യുമെന്ന് കെ.എസ്.ഇ.എസ്.എ ഭാരവാഹികള്‍ അറിയിച്ചു.അസോസിയേഷന്‍ സംസ്ഥാന പ്രസിഡന്റ് സി.പി റെനി അധ്യക്ഷനാകുന്ന ചടങ്ങില്‍ 2015ല്‍ മുഖ്യമന്ത്രിയുടെ എക്‌സൈസ് മെഡല്‍ കരസ്ഥമാക്കിയ ജീവനക്കാരേയും വിദ്യാഭ്യാസ മേഖലയില്‍ ഉന്നതവിജയം നേടിയ ജില്ലയിലെ ജീവനക്കാരുടെ മക്കളേയും ആദരിക്കും. എം.കെ രാഘവന്‍ എം.പി, എം.എല്‍.എമാരായ ഇ.കെ വിജയന്‍, എ. പ്രദീപ് കുമാര്‍, എം.കെ മുനീര്‍, വി.കെ.സി മമ്മദ് കോയ, പി.ടി.എ റഹീം, പാറക്കല്‍ അബ്ദുല്ല സംബന്ധിക്കും.
  രണ്ടുമണിക്ക് നടക്കുന്ന സാംസ്‌ക്കാരിക സമ്മേളനം പുരുഷന്‍ കടലുണ്ടി എം.എല്‍.എ ഉദ്ഘാടനം ചെയ്യും. എഴുത്തുകാരന്‍ യു.എ ഖാദര്‍, സംവിധായകന്‍ രഞ്ജിത്ത്, ടി.പി രാജീവന്‍, ഖദീജ മുംതാസ്, ഇന്ദു മേനോന്‍ തുടങ്ങിയവര്‍ സംസാരിക്കും. ആലങ്കോട് ലീലാകൃഷ്ണന്‍ മുഖ്യപ്രഭാഷണം നടത്തും.
ഏഴിന് രാവിലെ സുഹൃദ് സമ്മേളനം മന്ത്രി എ.കെ ശശീന്ദ്രനും സമാപന സമ്മേളനം മേയര്‍ തോട്ടത്തില്‍ രവീന്ദ്രനും ഉദ്ഘാടനം ചെയ്യും. വൈകിട്ട് പുതിയ ഭാരവാഹികളെ തെരഞ്ഞെടുക്കും. വാര്‍ത്താസമ്മേളനത്തില്‍ അസോസിയേഷന്‍ സംസ്ഥാന പ്രസിഡന്റ് സി.പി റെനി, ജനറല്‍ സെക്രട്ടറി പി.പി മുഹമ്മദ്, എ.കെ ശ്രീധരന്‍, കെ. യൂസഫ്, കെ.സി കരുണാകരന്‍, സി.പി ഷാജു പങ്കെടുത്തു.