കൊച്ചി: മുന്‍ മുഖ്യമന്ത്രി ഉമ്മന്‍ചാണ്ടിയുടെയും പ്രതിപക്ഷ നേതാവ് രമേശ് ചെന്നിത്തലയുടെയും നേതൃത്വത്തില്‍ യു.ഡി.എഫ് സംസ്ഥാന നേതാക്കള്‍ നടത്തുന്ന ജനകീയ മെട്രോ യാത്ര ഇന്ന്. ഉച്ചകഴിഞ്ഞ് 2.30 ന് ആലുവ മെട്രോ സ്റ്റേഷനിലെത്തി ടിക്കറ്റെടുത്താണ് നേതാക്കള്‍ പാലാരിവട്ടത്തേക്ക് യാത്ര ചെയ്യുന്നത്. യു.ഡി.എഫ് നേതാക്കളായ എം.എം ഹസന്‍, പി.കെ കുഞ്ഞാലിക്കുട്ടി, പി.പി തങ്കച്ചന്‍, ആര്യാടന്‍ മുഹമ്മദ്, മേയര്‍ സൗമിനി ജെയിന്‍ , സി.പി ജോണ്‍, അനൂപ് ജേക്കബ് ,ജോണി നെല്ലൂര്‍, തുടങ്ങിയവര്‍ പങ്കെടുക്കും.പാലാരിവട്ടം മെട്രോ സ്റ്റേഷനില്‍ യു.ഡി.എഫ് ജില്ലാ കമ്മിറ്റിയുടെ നേതൃത്വത്തില്‍ സ്വീകരണം. തുടര്‍ന്ന് തുറന്ന വാഹനത്തില്‍ പാലാരിവട്ടം ജങ്്ഷനിലെ സമ്മേളന സ്ഥലത്തേക്ക് നേതാക്കളെ ആനയിക്കും. കേരളത്തിന്റെ സ്വപ്ന പദ്ധതി കൊച്ചിയില്‍ നടപ്പാക്കിയ നേതാക്കള്‍ക്ക് നഗരം നല്‍കുന്ന സ്വീകരണമാണിതെന്ന് ഡി.സി.സി പ്രസിഡന്റ് ടി.ജെ വിനോദ് പറഞ്ഞു