കാസര്‍കോട്: കാണാതായ യുവതിയെ കൊലപ്പെടുത്തി പുഴയില്‍ കെട്ടി താഴ്ത്തിയതായി സംശയം. പൊലിസും അഗ്‌നി രക്ഷസേനയും തിരച്ചില്‍ ആരംഭിച്ചു. വിദ്യാനഗറിലെ വാടക ക്വട്ടേഴ്‌സില്‍ താമസിക്കുന്ന യുവതിയുടെ മൃതദേഹമാണ് കല്ലു കെട്ടി തെക്കില്‍ പാലത്തിനടുത്ത ചന്ദ്രഗിരി പുഴയില്‍ താഴ്ത്തിയെതെന്ന് പൊലിസിന് വിവരം ലഭിച്ചത്.

കഴിഞ്ഞ മാസം 19 മുതല്‍ യുവതിയെ കാണാനില്ലെന്ന് കാണിച്ച് ഭര്‍ത്താവ് വിദ്യാനഗര്‍ പൊലിസില്‍ പരാതി നല്‍കിയിരുന്നു. ഈ പരാതിയുടെ അന്വേഷണത്തിനിടെയാണ് യുവതിയെ കൊലപ്പെടുത്തി തെക്കില്‍ പാലത്തിനടുത്തെ പുഴയില്‍ കല്ല്‌കെട്ടി താഴ്ത്തിയതായി പൊലിസിന് വിവരം ലഭിച്ചത്. തുടര്‍ന്ന് വിദ്യാനഗര്‍ പൊലിസിന്റെയും കാസര്‍കോട് നിന്നെത്തിയ അഗ്‌നി രക്ഷസേനയുടെയും നേതൃത്വത്തില്‍ ഇന്ന് രാവിലെ മുതല്‍ പുഴയില്‍ പരിശോധന തിരച്ചില്‍ ആരംഭിച്ചു. ആലപ്പുഴ സ്വദേശിനിയാണ് യുവതി.സംഭവവുമായി ബന്ധപ്പെട്ട് ഒരാളെ പൊലിസ് കസ്റ്റഡിയില്‍ എടുത്തതായും സൂചനയുണ്ട്.