റിയോ ഡി ജനീറോ: ഒളിംപിക് പുരുഷ വിഭാഗം ഫുട്‌ബോളില്‍ ആതിഥേയരായ ബ്രസീലിന് സമനില കുരുക്ക്. ദുര്‍ബലരായ ദക്ഷിണാഫ്രിക്ക ബ്രസീലിനെ ഗോള്‍രഹിത സമനിലയില്‍ കുരുക്കുകയായിരുന്നു. സൂപ്പര്‍ താരം നെയ്മര്‍ കളം നിറഞ്ഞു കളിച്ചെങ്കിലും ഗോള്‍ നേടാന്‍ മാത്രം സാധിച്ചില്ല.

അതേസമയം വമ്പന്‍മാരുടെ കരുത്തുമായെത്തിയ അര്‍ജന്റീനയെ എതിരില്ലാത്ത രണ്ടു ഗോളിന് പോര്‍ച്ചുഗല്‍ വീഴ്ത്തി. പിറ്റെ, ഗോണ്‍സാലോ പാസിയെന്‍സിയ എന്നിവര്‍ പറങ്കിപടയ്ക്കായി സ്‌കോര്‍ ചെയ്തു. മറ്റൊരു മത്സരത്തില്‍ നിലവിലെ ചാംപ്യന്‍മാരായ മെക്‌സിക്കോയെ 2-2ന് ജര്‍മനി സമനിലയില്‍ കുരുക്കി. മെക്‌സിക്കോയ്ക്കായി ഒറിബെ പെരാല്‍റ്റ, റോഡോള്‍ഫോ പിസാരോ എന്നിവര്‍ സ്‌കോര്‍ ചെയ്തപ്പോള്‍ ജര്‍മനിക്കായി സെര്‍ജി നാബ്‌റി, മത്യാസ് ജിന്‍ഡര്‍ ഗോള്‍ നേടി.

മറ്റു മത്സരങ്ങളില്‍ നൈജീരിയ നാലിനെതിരേ അഞ്ചു ഗോളുകള്‍ക്ക് ജപ്പാനെയും ഹോണ്ടുറാസ് രണ്ടിനെതിരേ മൂന്നു ഗോളുകള്‍ക്ക് അള്‍ജീരിയയെ പരാജയപ്പെടുത്തി. സ്വീഡന്‍-കൊളംബിയ മത്സരം രണ്ടു വീതം ഗോള്‍ നേടി സമനിലയില്‍ പിരിഞ്ഞു.