പാണ്ടിക്കാട്: വെട്ടിക്കാട്ടിരിയിലൂടെ മഞ്ചേരി പാണ്ടിക്കാട് ഭാഗത്തേക്കും തിരിച്ചും സര്‍വിസ് നടത്തുന്ന ബസുകളുടെ കുറവ് യാത്രക്കാരെ ദുരിതത്തിലാക്കുന്നു. നിലവില്‍ രണ്ട് മിനി ബലുകളാണ് സര്‍വിസ് നടത്തുന്നത്. എണ്ണക്കുറവ് കാരണം ഗ്രാമത്തില്‍ നിന്ന് മഞ്ചേരി പാണ്ടിക്കാട് എന്നിവിടങ്ങളിലേക്ക് നിത്യേന യാത്ര ചെയ്യേണ്ടിവരുന്ന ജീവനക്കാര്‍, വിദ്യാര്‍ഥികള്‍, രോഗികള്‍ അടക്കമുള്ളവര്‍ക്ക് കൃത്യസമയത്ത് യഥാസ്ഥാനങ്ങളില്‍ എത്തിപ്പെടാനാകാത്ത സാഹചര്യമാണുള്ളത്. വൈകിട്ട് ഇരുട്ടും മുന്‍പ് വീടണയാന്‍ സ്ത്രീകളും വിദ്യാര്‍ഥികളും ഏറെ പ്രയാസപ്പെടുകയാണ്. നിലവില്‍ ഓടികൊണ്ടിരിക്കുന്ന ബസുകളില്‍ ഒരെണ്ണം മുടങ്ങിയാല്‍ പകരം  സര്‍വിസ് ഇല്ലാത്തതും ഇവിടത്തുകാരെ പ്രയാസപ്പെടുത്തുന്നു. പ്രദേശത്തിലൂടെ കെ.എസ്.ആര്‍.ടി.സി സര്‍വിസ് തുടങ്ങണമെന്നാണ് നാട്ടുകാരുടെ ആവശ്യം.