റിയാദ്: സഊദിയിൽ ധന, ഇൻഷുറൻസ് സ്ഥാപനങ്ങളിൽ ആയിരക്കണക്കിന് തൊഴിലുകൾ സഊദി വത്കരിക്കാൻ നീക്കമാരംഭിച്ചു. ഇത്തരം സ്ഥാപനങ്ങളിലെ ഏതാനും ഉന്നത ജോലികളാണ് സഊദികൾക്ക് മാത്രമായി പരിമിതപ്പെടുത്തുന്നത്. സഊദി കേന്ദ്ര ബാങ്ക് സഊദി അറേബ്യൻ മോണിട്ടറി അതോറിറ്റിയുടെ (സാമ) മേൽനോട്ടത്തിനു കീഴിൽ13,000 ഉന്നത തസ്തികകളാണ് സഊദി വൽക്കരിക്കുന്നത്. ഇതോടെ ഈ മേഖലയിൽ നിന്നും വിദേശികൾക്കു തൊഴിൽ നഷ്ടപ്പെടും.

 

       ബാങ്കുകൾ, വിദേശ ബാങ്ക് ശാഖകൾ, ഇൻഷുറൻസ് കമ്പനികൾ, റീ-ഇൻഷുറൻസ് കമ്പനികൾ, വിദേശ ഇൻഷുറൻസ് കമ്പനികൾ, ഫിനാൻസ് കമ്പനികൾ, റീ-ഫിനാൻസ് കമ്പനികൾ, കോൺട്രാക്ട് രജിസ്‌ട്രേഷൻ കമ്പനികൾ, ക്രെഡിറ്റ് ഇൻഫർമേഷൻ കമ്പനികൾ, മണി എക്‌സ്‌ചേഞ്ചുകൾ,  പെയ്‌മെന്റ്-ഫിനാൻഷ്യൽ ടെക്‌നോളജി കമ്പനികൾ, ലൈസൻസുള്ള ഫ്രീ പ്രൊഫഷൻ കമ്പനികൾ എന്നിവയിലാണ് സഊദി വൽക്കരണം നടപ്പാക്കുക. 

 

  ഇത്തരംസ്ഥാപനങ്ങളിലെ മാനവശേഷി മാനേജർ, സൈബർ സെക്യൂരിറ്റി മാനേജർ, ഐ.ടി മാനേജർ, കോംപ്ലിയൻസ് മാനേജർ, പണം വെളുപ്പിക്കൽ-ഭീകരതക്കുള്ള ഫണ്ടിംഗ് വിരുദ്ധ വിഭാഗം മാനേജർ, ലീഗൽ മാനേജർ, ഗവേണൻസ് മാനേജർ (ഡയറക്ടർ ബോർഡ് സെക്രട്ടറി), ഫിനാൻഷ്യൽ എക്‌സിക്യൂഷൻ വിഭാഗം മാനേജർ, ഇൻഷുറൻസ് കമ്പനികളിലെ കസ്റ്റമർ കെയർ വിഭാഗം മാനേജർ, വാഹന ഇൻഷുറൻസ് ക്ലെയിം വിഭാഗം മാനേജർ, ഇൻഷുറൻസ് കമ്പനികളിലെ റീട്ടെയിൽ സെയിൽസ് മാനേജർ എന്നീ തസ്തികകളാണ് വിദേശികളെ ഒഴിവാക്കി പകരം സഊദികൾക്കായി പരിമിതപ്പെടുത്തുന്നത്. ഇത്തരം കമ്പനികളിലെ ഉയർന്ന തസ്തികകളിൽ വിദേശികളെ നിയമിക്കേണ്ട ആവശ്യം വരികയാണെങ്കിൽ മതിയായ യോഗ്യതകളുള്ള സ്വദേശികളെ കിട്ടാനില്ല എന്ന കാര്യം സ്ഥാപനങ്ങൾ തെളിയിക്കണമെന്നും വ്യവസ്ഥയുണ്ട്.