കൊച്ചി: സംസ്ഥാന സര്‍ക്കാരിന്റെ കഴിഞ്ഞ ഒരു വര്‍ഷത്തെ വികസന, ക്ഷേമപ്രവര്‍ത്തനങ്ങള്‍ ജനമധ്യത്തിലെത്തിക്കുന്നതിന് ഇന്‍ഫര്‍മേഷന്‍ പബ്ലിക്ക് റിലേഷന്‍സ് വകുപ്പ് സജ്ജമാക്കിയ നവകേരള എക്‌സ്പ്രസും കലാജാഥയും ഇന്ന് മുതല്‍ മൂന്നു ദിവസം ജില്ലയില്‍ പര്യടനം നടത്തും. ഫോര്‍ട്ടുകൊച്ചി ബസ് സ്റ്റാന്റിന് സമീപം രാവിലെ 10ന് കെ.ജെ മാക്‌സി എം.എല്‍.എ ഫ്‌ളാഗ് ഓഫ് നിര്‍വഹിക്കും. തുടര്‍ന്ന് ആദ്യദിവസമായ ഇന്ന് പള്ളുരുത്തി വെളി മൈതാനം, വൈറ്റില, കാക്കനാട്, സൗത്ത് കളമശ്ശേരി, പാലാരിവട്ടം എന്നിവിടങ്ങളിലും നവകേരള എക്‌സ്പ്രസ് എത്തും.

നാളെ എറണാകുളം ബോട്ടുജെട്ടിയിലാണ് പര്യടനത്തിന് തുടക്കം. മാലിപ്പുറം, ചെറായി, പറവൂര്‍, ആലുവ, അത്താണി എന്നിവിടങ്ങളാണ് സ്വീകരണ കേന്ദ്രങ്ങള്‍. ശനിയാഴ്ച്ച പെരുമ്പാവൂരില്‍ തുടങ്ങുന്ന പര്യടനം കോതമംഗലം, മൂവാറ്റുപുഴ, കോലഞ്ചേരി, പിറവം, മുളന്തുരുത്തി എന്നിവിടങ്ങളില്‍ സ്വീകരണമേറ്റു വാങ്ങി തൃപ്പൂണിത്തുറയില്‍ സമാപിക്കും. തിരുവനന്തപുരത്ത് ശംഖുമുഖം കടപ്പുറത്ത് നിന്നാരംഭിച്ച നവകേരള എക്‌സ്പ്രസിന്റെ പര്യടനം കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി ജില്ലകള്‍ പിന്നിട്ടാണ് എറണാകുളത്തെത്തുന്നത്.
മുഖ്യമന്ത്രി പിണറായി വിജയന്‍ നയിക്കുന്ന കേരള സര്‍ക്കാര്‍ കഴിഞ്ഞ ഒരു വര്‍ഷം നടപ്പാക്കിയ പദ്ധതികളുടെയും ക്ഷേമപ്രവര്‍ത്തനങ്ങളുടെയും ചിത്രങ്ങളും വീഡിയോകളുമാണ് നവകേരള എക്‌സ്പ്രസ് എന്ന സഞ്ചരിക്കുന്ന പ്രദര്‍ശന വാഹനത്തിലുള്ളത്. സംസ്ഥാന സര്‍ക്കാരിന്റെ നവകേര കര്‍മപദ്ധതിയുടെ ഭാഗമായ ഹരിതകേരളം, ആര്‍ദ്രം, ലൈഫ്, പൊതുവിദ്യാഭ്യാസ സംരക്ഷണം എന്നീ നാല് മിഷനുകള്‍ വിശദമാക്കുന്ന ത്രിമാന മാതൃകകളും പ്രദര്‍ശന വാഹനത്തില്‍ ഒരുക്കിയിരിക്കുന്നു. സ്ത്രീസുരക്ഷ, വിദ്യാഭ്യാസം, ആരോഗ്യം, കൃഷി, തുടങ്ങി വിവിധ വകുപ്പുകളുടെ പ്രവര്‍ത്തനങ്ങളില്‍ കേരളം മറ്റ് സംസ്ഥാനങ്ങള്‍ക്ക് എങ്ങനെ മാതൃകയാകുന്നുവെന്നും പ്രദര്‍ശനം വ്യക്തമാക്കുന്നു.

.