#ഉബൈദുല്ല റഹ്മാനി കൊമ്പംകല്ല്

മനാമ: ബഹ്‌റൈനില്‍ ഒരു മാസം മുമ്പെ കാണാതായ മലയാളിയെ മരിച്ച നിലയില്‍ കണ്ടെത്തി. കോട്ടയം പണമ്പുഴ സ്വദേശി സാജുകുര്യ(55)ന്റെ മൃതദേഹമാണ് അഴുകിയ നിലയില്‍ റഫ പ്രവിശ്യയില്‍ വെച്ച് കണ്ടെത്തിയത്.

കഴിഞ്ഞമാസം ഒക്ടോബര്‍ 11 നായിരുന്നു സാജുകുര്യന്റെ തിരോധാനം. 2007 മുതല്‍ ബഹ്‌റൈനിലുള്ള സാജുകുര്യന്‍ താന്‍ ജോലി ചെയ്യുന്ന സിയാം ഗ്രൂപ്പ് കമ്പനിയുടെ ഉടമസ്ഥതയിലുള്ള റിഫയിലെ മജ് ലിസിലായിരുന്നു താമസിച്ചിരുന്നത്. ഇവിടെ വെച്ചാണ് അദ്ധേഹത്തെ കാണാതായത്.

സാജുകുര്യന്റെ സഹോദരന്‍ സാബുകുര്യനും കുടുംബവും ബഹ്‌റൈനിലുണ്ട്. കമ്പനി അധികൃതര്‍ ഇവരുമായി ബന്ധപ്പെട്ട് പലയിടത്തും അന്വേഷിച്ചെങ്കിലും കണ്ടെത്തിയിരുന്നില്ല. ഇതേ തുടര്‍ന്ന് കമ്പനി അധികൃതരും കുടുബവും പോലീസില്‍ പരാതി നല്‍കി അന്വേഷണം തുടരുന്നതിനിടയിലാണ് മൃതദേഹം റഫ പ്രവിശ്യയില്‍ കണ്ടെത്തിയതായി ആഭ്യന്തര മന്ത്രാലയം അധികൃതര്‍ അറിയിച്ചത്. മരണപ്പെട്ട് ദിവസങ്ങള്‍ കഴിഞ്ഞിരുന്നതിനാല്‍ മൃതദേഹം അഴുകിയ നിലയിലായിരുന്നു. സാബുകുര്യന്റെ രക്ത സാമ്പിളുകള്‍ ഉള്‍പ്പെടെയുള്ളവ പരിശോധിച്ചാണ് മൃതദേഹം സാജുവിന്റേതാണെന്ന് ഉറപ്പു വരുത്തിയത്.

ബഹ്‌റൈനില്‍ പ്രവാസി മലയാളിയെ കാണാനില്ലെന്ന് പരാതി

കഴിഞ്ഞ മാസം 12ന് സജുവിനെ കാണാനില്ലെന്നും ജോലിക്കെത്തിയിട്ടില്ലെന്നുമുള്ള വിവരം കമ്പനി അധികൃതര്‍ സഹോദരന്‍ സാബുവിനെ വിളിച്ചറിയിച്ചപ്പോഴാണ് തിരോധാനത്തെ കുറിച്ച് തങ്ങളറിഞ്ഞതെന്ന് സാബുവിന്റെ ഭാര്യ നേരത്തെ സുപ്രഭാതത്തോട് പറഞ്ഞിരുന്നു. ഇക്കാര്യം സുപ്രഭാതം റിപ്പോര്‍ട്ട് ചെയ്തിരുന്നു

സാധാരണയായി എല്ലാ വെള്ളിയാഴ്ചയും ഇവര്‍ പരിസരത്തെ ഒരു ചര്‍ച്ചില്‍ വെച്ച് കണ്ടുമുട്ടാറുണ്ടെന്നും എന്നാല്‍ തിരോധാനം സംഭവിച്ച വെള്ളിയാഴ്ച മുതല്‍ സാജുകുമാര്‍ ചര്‍ച്ചിലെത്തിയിട്ടില്ലെന്നും അവര്‍ അറിയിച്ചു. ഇതേ തുടര്‍ന്ന് വ്യാപകമായ തിരച്ചില്‍ നടത്തിയെങ്കിലും ഒരു തുമ്പും കിട്ടിയിരുന്നില്ല.

ഇതിനിടെ അന്വേഷണം ശക്തമാക്കണമെന്ന് ആവശ്യപ്പെട്ട് നാട്ടിലുള്ള കുടുംബം ഇന്ത്യന്‍ എംബസി, നോര്‍ക്ക, വിദേശകാര്യമന്ത്രി എന്നിവരുമായെല്ലാം ബന്ധപ്പെട്ടിരുന്നു. ഏറ്റവും ഒടുവില്‍ ബഹ്‌റൈന്‍ പോലീസില്‍ നല്‍കിയ പരാതി പോലീസ് ഓംബുഡ്‌സ്മാനും കൈമാറിയിരുന്നു.

ഇപ്രകാരം അന്വേഷണം പുരോഗമിക്കുന്നതിനിടെയാണ് റഫയിലെ ആളൊഴിഞ്ഞ പ്രദേശത്ത് മൃതദേഹം പോലീസ് കണ്ടെത്തിയതും സഹോദരനെ വിളിച്ചു വരുത്തി ഉറപ്പു വരുത്തുകയും ചെയ്യുകയായിരുന്നു.  സമയം മരണകാരണം സംബന്ധിച്ച് ലഭ്യമായ വിശദാംശങ്ങളൊന്നും പോലീസ് പുറത്തുവിട്ടിട്ടില്ല. സംഭവത്തെ കുറിച്ച് സമഗ്രമായ അന്വേഷണം തുടരുന്നുവെന്നാണ് സൂചന. തുടര്‍ നടപടികള്‍ക്കായി മൃതദേഹം വൈകാതെ സല്‍മാനിയ മോര്‍ച്ചറിയിലേക്ക് മാറ്റും. നടപടികള്‍ ഉടന്‍ പൂര്‍ത്തിയാക്കി മൃതദേഹം നാട്ടിലെത്തിക്കണമെന്നാണ് കുടുംബത്തിന്റെ ആവശ്യം.