രാവിലെ സ്വര്‍ണഖനിയിലെ ജീവനക്കാര്‍ വിശ്രമിക്കുമ്പോഴായിരുന്നു അപകടം. ഡാമിനു താഴെയുള്ള ഗ്രാമങ്ങളിലുള്ളവര്‍ ഉറക്കിലായിരുന്നു

മോസ്‌കോ: സൈബീരിയയില്‍ സ്വര്‍ണഖനിക്കു സമീപത്തെ അനധികൃത ഡാം തകര്‍ന്ന് 15 പേര്‍ മരിച്ചു. 13 പേരെ കാണാതായി. സീബ നദിക്കു കുറുകെ നിയമവിരുദ്ധമായി പണിത ഡാമാണ് തകര്‍ന്നത്. തുടര്‍ന്ന് ചെളി നിറഞ്ഞ ജലം സമീപത്തെ ഗ്രാമങ്ങളിലേക്ക് കുത്തിയൊലിച്ച് സര്‍വനാശം വിതക്കുകയായിരുന്നു.
രാവിലെ ആറുമണിക്ക് സ്വര്‍ണഖനിയിലെ ജീവനക്കാര്‍ വിശ്രമിക്കുമ്പോഴായിരുന്നു അപകടം. ഡാമിനു താഴെയുള്ള ഗ്രാമങ്ങളിലുള്ളവര്‍ ഉറക്കിലായിരുന്നു. എന്താണ് സംഭവിച്ചതെന്ന് അവര്‍ക്ക് മനസ്സിലായില്ല. ആറ് ഹെലികോപ്റ്ററുകളും ബോട്ടുകളും ഉപയോഗിച്ച് രക്ഷാപ്രവര്‍ത്തനം പുരോഗമിക്കുന്നതായി അധികൃതര്‍ അറിയിച്ചു. കുന്നുകളും മരങ്ങളും നിറഞ്ഞ ഒറ്റപ്പെട്ട പ്രദേശത്താണ് ഡാം ഉണ്ടായിരുന്നത്.