കൊച്ചി: തൃപ്തി ദേശായി ശബരിമലയില്‍ എത്തിയാല്‍ എല്ലാവിധ സംരക്ഷണവും നല്‍കണമെന്ന് സംസ്ഥാന വനിതാകമ്മിഷന്‍ അധ്യക്ഷ എം.സി ജോസഫൈന്‍. കൊച്ചിയില്‍ നടന്ന അദാലത്തിനു ശേഷം നടത്തിയ വാര്‍ത്താസമ്മേളനത്തില്‍ സംസാരിക്കുകയായിരുന്നു അവര്‍. സുപ്രിംകോടതി വിധിയെ മാനിക്കാന്‍ എല്ലാവര്‍ക്കും ബാധ്യതയുണ്ട്. സാമൂഹികാന്തരീക്ഷം കലുഷിതമാക്കാതെ കേരളത്തില്‍ സ്ത്രീകള്‍ക്ക് ശബരിമലയില്‍ പ്രവേശിക്കാന്‍ കഴിയണം. സമൂഹത്തില്‍ നിലനിന്നിരുന്ന പലതരത്തിലുള്ള സ്ത്രീ വിരുദ്ധ ആചാരങ്ങളെയും മറികടന്നത് വിപ്ലവകരമായ പ്രവര്‍ത്തനങ്ങളിലൂടെയാണെന്നും അവര്‍ പറഞ്ഞു.
ഹാദിയ കേസ് ഉള്‍പ്പെടെയുള്ള വിഷയങ്ങളില്‍ ഒരുവിഭാഗം ആളുകള്‍ നീതിനിഷേധത്തിന്റെ ഭാഗത്താണ് നിലകൊണ്ടത്.
കേരളത്തിന്റെ സ്ത്രീസ്വാതന്ത്ര്യത്തിനെതിരേയുള്ള കടന്നുകയറ്റത്തിന്റെ പ്രതീകമായിരുന്നു ഹാദിയയെന്നും വിഷയത്തില്‍ ഇടപെട്ടുവെന്നതിന്റെ പേരില്‍ തന്നെ ചിലര്‍ ആക്രമിക്കാന്‍ ശ്രമിച്ചുവെന്നും ജോസഫൈന്‍ പറഞ്ഞു.