അമ്പലപ്പുഴ : അമിത വേഗതയില്‍ എത്തിയ കെ.എസ്.ആര്‍.ടി.സി ബസ് ദമ്പതികള്‍ സഞ്ചരിച്ചിരുന്ന കാറിന് പിന്നിലിടിച്ച് ഒരാള്‍ക്ക് പരുക്ക്. അമ്പലപ്പുഴ വടക്ക് പഞ്ചായത്ത് നീര്‍ക്കുന്നം സി.എം ഹൗസില്‍ ആശിറിന്റെ ഭാര്യ ഷീജ (44)യെ ആണ് വണ്ടാനം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചത്. ഇന്നലെ ഉച്ചയോടെ ദേശീയ പാതയില്‍ പുന്നപ്ര മാര്‍ക്കറ്റ് ജങ്ഷനില്‍വച്ചായിരുന്നു അപകടം. ദമ്പതികള്‍ സഞ്ചരിച്ചിരുന്ന കാറിന് പിന്നില്‍ തിരുവനന്തപുരത്ത് നിന്ന് താമരശ്ശേരിക്കു പോകുകയായിരുന്ന ബസ് ഇടിക്കുകയായിരുന്നു. ഇടിയുടെ ആഘാതത്തില്‍ കാറിന്റെ പിന്‍ഭാഗത്തെ ചില്ല് പൂര്‍ണ്ണമായി തകരുകയും ഷീജയുടെ തലക്ക് പരുക്കേല്‍ക്കുകയുമായിരുന്നു. ഇതേ സമയം നിരവധി വിദ്യാര്‍ഥികളും യാത്രക്കാരുമാണ് ഈ ഭാഗത്ത് ബസ് കാത്ത് നിന്നിരുന്നത്. കാര്‍ നിയന്ത്രണം വിട്ട് ദിശമാറിയതിനാല്‍ വന്‍ ദുരന്തമാണ് ഒഴിവായത്. ഈ ഭാഗത്ത് അപായസൂചന വിളക്ക് സ്ഥാപിച്ചിട്ടുണ്ടെങ്കിലും ഇതിനെ മറികടന്നാണ് അപകടം വരുത്തിവെച്ചത്.