ന്യൂഡല്‍ഹി: വന്‍ ഭൂരിപക്ഷത്തോടെ നരേന്ദ്രമോദിയുടെ നേതൃത്വത്തില്‍ രണ്ടാമതും ബി.ജെ.പി സര്‍ക്കാര്‍ അധികാരത്തിലെത്തിയ ശേഷമുള്ള ആദ്യ പാര്‍ലമെന്റ് സമ്മേളനത്തില്‍ തന്നെ മുത്വലാഖ് നിരോധന ബില്ല് പാസാക്കുകയും 370 വകുപ്പ് റദ്ദാക്കുകയും ചെയ്തതിന് പിന്നാലെ, സര്‍ക്കാരിന്റെ അടുത്ത നോട്ടം ഇനി ഇന്ത്യന്‍ പീനല്‍ കോഡി(ഐ.പി.സി)ല്‍. ഐ.പി.സി നിയമം മൊത്തം പൊളിച്ചെഴുതാന്‍ കേന്ദ്രസര്‍ക്കാര്‍ നീക്കം തുടങ്ങിയതായി ദി ഹിന്ദു റിപ്പോര്‍ട്ട്‌ചെയ്തു. ബ്രിട്ടീഷ് ഭരണകൂടമാണ് ഐ.പി.സി നിയമം കൊണ്ടുവന്നതെന്നും അതിനാല്‍ അതു മൊത്തം പൊളിച്ചെഴുതേണ്ടതുണ്ടെന്നും ചൂണ്ടിക്കാണിച്ചാണ് സര്‍ക്കാരിന്റെ നീക്കം.

ആഭ്യന്തരമന്ത്രാലയത്തിന് കീഴില്‍ രണ്ട് വിദഗ്ധസമിതികള്‍ രൂപീകരിച്ചാണ് ഇതിനുള്ള നീക്കം സര്‍ക്കാര്‍ നടത്തുന്നത്. കേന്ദ്ര ആഭ്യന്തരമന്ത്രി അമിത്ഷായാണ് ഇക്കാര്യത്തിലുള്ള പ്രവര്‍ത്തനങ്ങളെല്ലാം ഏകോപിപ്പിക്കുന്നത്. ഐ.പി.സിയില്‍ മാറ്റങ്ങള്‍ വരുത്തുന്നത് സംബന്ധിച്ച് നിര്‍ദേശങ്ങള്‍ തേടി കേന്ദ്രസര്‍ക്കാര്‍ സംസ്ഥാനങ്ങള്‍ക്കും കേന്ദ്ര ഭരണപ്രദേശങ്ങള്‍ക്കും കത്തയച്ചു. 1860കളില്‍ ഐ.പി.സി നിലവില്‍വന്ന ശേഷം ചെറിയ ഭേദഗതികള്‍ ഉണ്ടായെങ്കിലും മൊത്തത്തിലുള്ള മാറ്റങ്ങള്‍ വന്നിട്ടില്ലെന്ന് മന്ത്രാലയവൃത്തങ്ങള്‍ അറിയിച്ചു. ചില കൂട്ടിച്ചേര്‍ക്കലുകളും ചില നീക്കംചെയ്യലും ആവും ഉണ്ടാവുകയെന്നും വൃത്തങ്ങള്‍ കൂട്ടിച്ചേര്‍ത്തു.

Centre all set to revamp British-era Indian Penal Code. The Home Ministry is all set to overhaul the Indian Penal Code (IPC) designed by the British.