കൊടുവായൂര്‍: മൂലത്തറയില്‍നിന്നുള്ള വെള്ളം ലഭിക്കാത്തതിനെ തുടര്‍ന്ന് 106 ഹെക്ടര്‍ നെല്‍കൃഷി ഉണങ്ങിനശിക്കുന്നു. കൊടുവായൂര്‍, പല്ലശ്ശന, പെരുവെമ്പ, വടവന്നൂര്‍ പഞ്ചായത്തുകളില്‍ ഉള്‍പ്പെടുന്ന ഭൂമിയാണ് വെള്ളം ലഭിക്കാതെ ഉണങ്ങി നശിക്കുന്നത്. പല്ലശ്ശന പഞ്ചായത്തിലെ തറപ്പാടം കരിക്കമുളി പാടശേഖരത്തില്‍ ഉള്‍പ്പെടുന്ന തറപ്പാടം, കരിക്കമുളി, ചാളയ്ക്കല്‍, ഇട്ടിയമ്പാറ എന്നീ പ്രദേശങ്ങളില്‍ മാത്രം 40 ഹെക്ടര്‍ നെല്‍പ്പാടശേഖരങ്ങളാണ് വിണ്ടുകീറി വിളകള്‍ ഉണങ്ങി നശിക്കുന്നത്. മൂലത്തറ റെഗുലേറ്റര്‍ തുറന്ന് വെള്ളം ഉടന്‍ എത്തിച്ചില്ലെങ്കില്‍ നഷ്ടം പതിന്‍മടങ്ങാകുമെന്ന ഭീതിയിലാണ് പെരുവെമ്പിലെ കര്‍ഷകര്‍.