തിരുവനന്തപുരം: ജനനേന്ദ്രിയം ഛേദിക്കപ്പെട്ട കേസില്‍ സി.ബി.ഐ അന്വേഷണം വേണമെന്ന യുവതിയുടെ അപേക്ഷ തിരുവനന്തപുരം പോക്‌സോ കോടതി തള്ളി. കേസിലെ പരാതിക്കാരിയായ പെണ്‍കുട്ടിയാണ് സി.ബി.ഐ അന്വേഷണം ആവശ്യപ്പെട്ട് കോടതിയില്‍ ഹരജി സമര്‍പ്പിച്ചത്.
യുവതിയുടെ ഹരജിയിലെ ആവശ്യം കോടതിയുടെ പരിഗണനയില്‍ വരുന്നതല്ലെന്ന് പ്രോസിക്യൂഷന്‍ വാദിച്ചു. ഇത് പരിഗണിച്ചാണ് കോടതി ഹരജി തള്ളിയത്. നിലവിലെ പൊലിസ് അന്വേഷണം ശരിയായ ദിശയിലല്ലെന്നും പൊലിസ് കേസ് അട്ടിമറിക്കാന്‍ ശ്രമിക്കുകയാണെന്നും ചൂണ്ടിക്കാട്ടിയാണ് പെണ്‍കുട്ടി രണ്ട് ദിവസം മുന്‍പ് സി.ബി.ഐ അന്വേഷണം ആവശ്യപ്പെട്ട് ഹരജി സമര്‍പ്പിച്ചത്. രാവിലെ ഹരജി പരിഗണിച്ചപ്പോള്‍ പെണ്‍കുട്ടിക്ക് കോടതിയില്‍നിന്ന് വിമര്‍ശനം കേള്‍ക്കേണ്ടി വന്നു.
നിയമസാധുത പരിഗണിക്കാതെ അനാവശ്യ ഹരജികള്‍ നല്‍കി കോടതിയുടെ സമയം നഷ്ടപ്പെടുത്തരുതെന്ന് കോടതി ചൂണ്ടിക്കാട്ടി. അതിനിടെ കേസില്‍ പെണ്‍കുട്ടിക്കെതിരേ കേസെടുക്കേണ്ടെന്ന് പൊലിസിന് നിയമോപദേശം ലഭിച്ചു. രണ്ട് കേസുകള്‍ക്കും ഒറ്റ കുറ്റപത്രം സമര്‍പ്പിച്ചാല്‍ മതിയെന്നും നിയമോപദേശത്തില്‍ പറയുന്നു. നിലവില്‍ ഗംഗേശാനന്ദയ്‌ക്കെതിരേ മാത്രമാണ് കേസെടുത്തിട്ടുള്ളത്.