കാളികാവ്: അശരണരായി ഹിമയുടെ സ്‌നേഹത്തണലില്‍ അഭയം തേടിയ അതിഥികള്‍ക്ക് മധുര സമ്മാനവുമായി വിദ്യാര്‍ഥികളെത്തി. കാളികാവ് അടയ്ക്കകുണ്ടില്‍ അശരണര്‍ക്ക് അഭയമായി ഒരുക്കിയ ഹിമ കെയര്‍ ഹോമിലെ അന്തേവാസികള്‍ക്കാണ് സ്‌നേഹ സ്പര്‍ശവുമായി കരുവാരകുണ്ട് ദാറുന്നജാത്ത് ഒ.യു.പി.സ്‌കൂള്‍ വിദ്യാര്‍ഥികള്‍ എത്തിയത്. വിദ്യാലയത്തിലെ അന്‍പതോളം കുട്ടികളാണ് സ്‌നേഹ സമ്മാനങ്ങളുമായി ഹിമ സന്ദര്‍ശിച്ചത്.
പഴങ്ങളും മധുര പലഹാരങ്ങളുമായെത്തിയ കുട്ടിക്കൂട്ടം പാട്ടുകള്‍ പാടിയും നാടകമവതരിപ്പിച്ചും കൂടെ നിന്ന് പാട്ടുകള്‍ പാടിപ്പിച്ചും അന്തേവാസികളെ സന്തോഷിപ്പിച്ചു. ഓരോരുത്തരുമായി സംസാരിച്ചും വിശേഷങ്ങള്‍ അന്വേഷിച്ചും കുട്ടികള്‍ ഏറെ സമയം ചെലവഴിച്ചു.
പാഠ പുസ്തകങ്ങളില്‍ നിന്നും ക്ലാസ് മുറികളില്‍ നിന്നും മനസിലാക്കിയതിനെക്കാള്‍ ഒറ്റപ്പെട്ടവരുടെ ദുരിതങ്ങള്‍ കൂടുതല്‍ വ്യഥ നല്‍കുന്നതാണെന്ന് കുട്ടികള്‍ പറഞ്ഞു. നിങ്ങള്‍ ഞങ്ങളുടെ മക്കളാണെന്നും ഇനിയും വരണമെന്നും പറഞ്ഞാണ് അന്തേവാസികള്‍ കുട്ടി കളെയാത്രയാക്കിയത്.
സ്ഥാപന ഭാരവാഹികള്‍ വിദ്യാര്‍ഥികളെ സ്വീകരിച്ചു.