ഹൈദരാബാദ്: താന്‍ തരുന്ന പെന്‍ഷന്‍ വാങ്ങിക്കാനും റോഡ് ഉപയോഗിക്കാനും ഒരു മടിയുമില്ല, എന്നാല്‍ വോട്ട് ചെയ്യാന്‍ പറ്റില്ല; ഇതെങ്ങനെ ന്യായീകരിക്കാന്‍ പറ്റും. ചോദിക്കുന്നത് മറ്റാരുമല്ല, ആന്ധ്രാപ്രദേശ് മുഖ്യമന്ത്രി എന്‍. ചന്ദ്രബാബു നായിഡുവാണ്. കുര്‍ണൂല്‍ ജില്ലയിലെ നന്ദ്യാലില്‍ പാര്‍ട്ടി പരിപാടിയിലാണ് മുഖ്യമന്ത്രി ഇത്തരത്തില്‍ പ്രതികരിച്ചത്.
തന്റെ സര്‍ക്കാരിനെ ഇഷ്ടമല്ലെങ്കില്‍ പെന്‍ഷന്‍ വാങ്ങിക്കാതിരിക്കുകയും റോഡ് ഉപയോഗിക്കാതിരിക്കുകയും ചെയ്യാം. പാര്‍ട്ടി ജനങ്ങള്‍ക്കായി ഒരു പാട് കാര്യങ്ങള്‍ ചെയ്തിട്ടുണ്ട്. അതുകൊണ്ട് വോട്ട് ചോദിക്കുന്നതില്‍ മടികാണിക്കേണ്ടതില്ലെന്നും മുഖ്യമന്ത്രി പറഞ്ഞു. അഴിമതിയിലൂടെ നേടിയ പണം ജനങ്ങള്‍ക്ക് നല്‍കി വോട്ട് നേടുന്ന രാഷ്ട്രീയ നേതാക്കളുണ്ട്. അഴിമതിപ്പണം ഇത്തരത്തില്‍ ഉപയോഗപ്പെടുത്തിയാല്‍ എങ്ങനെ രാജ്യത്ത് അഴിമതിയില്ലാതാക്കും. വോട്ടിനുവേണ്ടി എനിക്കുവേണമെങ്കില്‍ 5000 രൂപ വരെ വോട്ടര്‍മാര്‍ക്ക് നല്‍കാനാകും. എന്നാല്‍ അഴിമതിയുടെ പങ്ക് ജനങ്ങള്‍ക്കു നല്‍കിയ ശേഷം അവരില്‍ നിന്ന് അതിന്റെ നൂറ് മടങ്ങ് തിരിച്ചു വാങ്ങിക്കുന്നതിനോട് തനിക്ക് യോജിപ്പില്ലെന്ന് ചന്ദ്രബാബു നായിഡു പറഞ്ഞു.