മണ്ണാര്‍ക്കാട്: അട്ടപ്പാടി മേഖലയില്‍ നാടന്‍ തോക്കും മാന്‍ കൊമ്പുമായി ഒരാള്‍ പിടിയിയില്‍. അഗളി കണ്ടിയൂര്‍ നെല്ലിക്കല്‍ വീട്ടില്‍ ചിദംബരന്‍ മകന്‍ സന്തോഷ് (37) ആണ് പൊലിസ് പിടയിലായത്. അഗളി എ.എസ്.പി നവനീത് ശര്‍മയക്ക്് ലഭിച്ച രഹസ്യവിവരത്തിന്റെ അടിസ്ഥാനത്തില്‍ എ.എസ്.പിയും സ്‌ക്വാഡും അഗളി പൊലിസിന്റെയും നേതൃത്വത്തിലാണ് പ്രതിയെ പിടികൂടിയത്. പ്രതിയുടെ വീടിനോട് ചേര്‍ന്നുള്ള ആലയില്‍നിന്നാണ് രണ്ട് തോക്കുകള്‍ നിര്‍മിക്കാനാവശ്യമായ ഇരുമ്പുകുഴലുകളും നാടന്‍ തോക്കിന്റെ യന്ത്ര ഭാഗങ്ങളും നിര്‍മാണ ഉപകരണങ്ങളും വെടിമരുന്നുകളും ഇയ്യ കട്ടകളും കണ്ടെടുത്തത്.
കൂടുതല്‍ പരിശോധനയില്‍ വീട്ടില്‍നിന്ന് മാന്‍കൊമ്പും കണ്ടെത്തുകയായിരുന്നു. തുടര്‍ന്ന് അറസ്റ്റ് രേഖപ്പെടുത്തി തുടര്‍നടപടികള്‍ സ്വീകരിച്ചു. പ്രതിക്ക് 2012ല്‍ ലൈസന്‍സില്ലാതെ നാടന്‍ തോക്ക് കൈവശം വച്ചതിന് അഗളി സ്റ്റേഷനില്‍ മറ്റൊരു കേസ്‌കൂടി നിലവിലുണ്ട്. അഗളി എ.എസ്.ഐ രതീഷ്, സി.പി.ഒമാരായ ജയപ്രകാശ്, റഫീഖ് സംഘത്തിലുണ്ടായിരുന്നു.