പാലക്കാട്: സംസ്ഥാനതല ദേശീയ ബാലശാസ്ത്ര കോണ്‍ഗ്രസ് മത്സരത്തില്‍നിന്നും പാലക്കാട് കാണിക്കമാത ഹയര്‍ സെക്കന്‍ഡറി സ്‌കൂളിലെ എസ്. അഷ്‌നയും എം. ഗോപികയും ദേശീയതല മത്സരത്തിലേക്ക് തിരഞ്ഞെടുക്കപ്പെട്ട ബാലശാസ്ത്രജ്ഞരായി. ജില്ലയില്‍നിന്നും തിരഞ്ഞെടുക്കപ്പെട്ട ആറ് കണ്ടെത്തലുകള്‍ ഉള്‍പ്പെടെ 87 ഗവേഷണങ്ങളാണ് കോഴിക്കോട് ജലവിഭവ വിനിയോഗ പഠന കേന്ദ്രത്തില്‍ (സി.ഡബ്ല്യു.ആര്‍.ഡി.എം) കഴിഞ്ഞ രണ്ടുദിവസങ്ങളിലായി കേരള ശാസ്ത്ര വിദഗ്ധര്‍ പരിശോധിച്ചത്.
അതില്‍ അഷ്‌നയും ഗോപികയും ഗൈഡ് എം. സ്മിതയുടെ സഹായത്തോടെ നടത്തിയ ശാസ്ത്രീയ ഗവേഷണ പരീക്ഷണങ്ങളിലൂടെ മനുഷ്യ മലത്തെ പൊടി രൂപത്തിലുള്ള മികച്ച ജൈവ വളമായും കുടിവെള്ളമായും വേര്‍തിരിച്ചെടുത്തത്.
ആര്‍ക്കും അരോചകമില്ലാതെ കൈകാര്യം ചെയ്യാമെന്ന തരത്തില്‍ ഇത്തരമൊരു കണ്ടെത്തലാണ് ഇവരെ ദേശീയതല ബാലശാസ്ത്ര മത്സരത്തിലേക്ക് തിരഞ്ഞെടുക്കപ്പെടുവാന്‍ കാരണമായത്. ഡിസംബര്‍ അവസാനവാരം ഭുവനേശ്വരില്‍ നടക്കാനിരിക്കുന്ന ദേശീയ മത്സരത്തില്‍ ഇവരുടെ കണ്ടെത്തലുകള്‍ അന്താരാഷ്ട്രതല മത്സരാര്‍ഥികളോടൊപ്പം മാറ്റുരക്കപ്പെടുമെന്ന് ജില്ലാ കോഓര്‍ഡിനേറ്റര്‍ എസ്. ഗുരുവായൂരപ്പന്‍ പറഞ്ഞു.
കേരളത്തില്‍നിന്ന് ആകെ 10 ഗവേഷണങ്ങള്‍ സീനിയര്‍ വിഭാഗത്തിലും ആറെണ്ണം ജൂനിയര്‍ വിഭാഗത്തിലുമായി ദേശീയ തലത്തില്‍ മത്സരിക്കും. കേരള ശാസ്ത്ര സാങ്കേതിക പരിസ്ഥിതി കൗണ്‍സിലാണ് പരിപാടിയുടെ കേരളത്തിലെ സംഘാടകര്‍.