ശ്രീനഗര്‍: ജമ്മു കശ്മീരിലെ കത്രയില്‍ കനത്ത മഴയെത്തുടര്‍ന്നുണ്ടായ മണ്ണിടിച്ചിലില്‍പ്പെട്ട് മൂന്ന് തീര്‍ഥാടകരടക്കം നാല് പേര്‍ മരിച്ചു. ഒമ്പതോളം പേര്‍ക്ക് പരുക്കേറ്റു.

കത്രയിലെ അര്‍ധകുമാരി ക്ഷേത്രത്തിനു സമീപത്താണ് അപകടം നടന്നത്. ഒരു സംഘം തീര്‍ഥാടകര്‍ വിശ്രമിക്കുന്ന സ്ഥലത്തേക്ക് വലിയൊരു കല്ല് വന്നു പതിക്കുകയായിരുന്നു. അഞ്ച് വയസുകാരനുള്‍പ്പെടെ മൂന്ന് പേര്‍ സംഭവ സ്ഥലത്തുവെച്ചു തന്നെ മരിച്ചു. മറ്റൊരാള്‍ ആശുപത്രിയിലെത്തിച്ച ശേഷമാണ് മരിച്ചത്.

പരുക്കേറ്റവരില്‍ രണ്ട് പേരുടെ നില അല്‍പം ഗുരുതരമാണെന്നും ഇവരെ സമീപത്തെ ആശുപത്രിയില്‍ പ്രവേശിപ്പിച്ചിരിക്കുകയാണെന്നും പൊലിസ് പറഞ്ഞു. കഴിഞ്ഞ കുറച്ചു ദിവസങ്ങളായി മേഖലയില്‍ കനത്ത മഴ തുടരുകയാണ്.