കൊച്ചി: കൊച്ചി മട്ടാഞ്ചേരിയില്‍ എല്‍.കെ.ജി വിദ്യാര്‍ത്ഥിയായ മൂന്നരവയസുകാരനെ ക്രൂരമായി മര്‍ദിച്ച സംഭവത്തില്‍ അധ്യാപികയെ അറസ്റ്റ് ചെയ്തു. പ്ലേ സ്‌കൂള്‍ അധ്യാപിക സീതാലക്ഷ്മിയെയാണ് മട്ടാഞ്ചേരി പൊലിസ് അറസ്റ്റ് ചെയ്തത്.

മട്ടാഞ്ചേരി പാലസ് റോഡിലെ സ്മാര്‍ട് കിഡ് എന്ന സ്ഥാപനത്തില്‍ ഇന്നലെയാണ് സംഭവം. ചോദ്യങ്ങള്‍ക്ക് ഉത്തരം പറയാത്തതിനെത്തുടര്‍ന്ന് അധ്യാപിക കുഞ്ഞിന്റെ മുതുകില്‍ ചൂരലുകൊണ്ട് അടിക്കുകയായിരുന്നു. കുട്ടി വീട്ടിലെത്തിയപ്പോഴാണ് തല്ലിയതിന്റെ പാടുകള്‍ രക്ഷിതാക്കളുടെ ശ്രദ്ധയില്‍പെട്ടത്. തുടര്‍ന്ന് ആശുപത്രിയില്‍ പ്രവേശിപ്പിക്കുകയായിരുന്നു. 

സംഭവത്തില്‍ അധ്യാപികയെ സസ്‌പെന്റ് ചെയ്തതായി സ്ഥാപനം അറിയിച്ചിരുന്നു. മാതാപിതാക്കളുടെ പരാതിയില്‍ മട്ടാഞ്ചേരി പൊലീസ് കേസെടുത്ത് അന്വേഷണം ആരംഭിച്ചിരുന്നു.