കൊച്ചി: തീരദേശ പരിപാലന-നിയന്ത്രണ മേഖലാ വിജ്ഞാപന പ്രകാരമുള്ള പ്രവര്‍ത്തനങ്ങളില്‍നിന്ന് ദേശീയ ഭൗമശാസ്ത്ര പഠന കേന്ദ്രത്തെ ഒഴിവാക്കണമെന്ന നിവേദനം കേന്ദ്ര സര്‍ക്കാര്‍ പരിഗണിച്ച് തീര്‍പ്പാക്കണമെന്ന് ഹൈക്കോടതി.
പാലക്കാട് മൂന്നേക്കര്‍ സ്വദേശി കെ.സി ജോണ്‍ നല്‍കിയ ഹരജിയിലാണ് വനം പരിസ്ഥിതി മന്ത്രാലയം പ്രിന്‍സിപ്പല്‍ സെക്രട്ടറി നാലുമാസത്തിനുള്ളില്‍ നിവേദനം പരിഗണിച്ചു തീര്‍പ്പാക്കണമെന്ന് ചീഫ് ജസ്റ്റിസ് അടങ്ങുന്ന ഡിവിഷന്‍ബെഞ്ച് ഉത്തരവിട്ടത്. 2011 ലെയും 2019 ലെയും തീരദേശ പരിപാലന-മേഖലാ നിയന്ത്രണ വിജ്ഞാപന പ്രകാരം നടപടികള്‍ സ്വീകരിക്കുന്നതില്‍ നിന്ന് പഠന കേന്ദ്രത്തെ ഒഴിവാക്കുന്നതിനൊപ്പം ഇവര്‍ നല്‍കിയ എല്ലാ റിപ്പോര്‍ട്ടുകളും അനുമതികളും പുനപരിശോധിക്കണമെന്നും ഹരജിയില്‍ ആവശ്യപ്പെട്ടിരുന്നു.
പഠന കേന്ദ്രം തയാറാക്കിയ തീര മേഖലാ മാനേജ്‌മെന്റ് പ്ലാന്‍ പ്രകാരം കേരളത്തിലെ നഗരസഭകള്‍ കോസ്റ്റല്‍ റെഗുലേറ്ററി സോണ്‍ രണ്ടിലും (വികസിത മേഖല) പഞ്ചായത്തുകള്‍ സോണ്‍ മൂന്നിലുമാണ് (അവികസിത മേഖല) ഉള്‍പ്പെട്ടത്. കൂടാതെ രണ്ട് സോണുകളിലെയും അതിലോല മേഖലകളെ സോണ്‍ ഒന്നിലും ആന്‍ഡമാന്‍ നിക്കോബാര്‍ ദ്വീപുകള്‍, ലക്ഷദ്വീപ് എന്നിവയെ സോണ്‍ നാലിലും ഉള്‍പ്പെടുത്തി.
എന്നാല്‍, പിന്നീട് രണ്ട് പഞ്ചായത്തുകളെ കായല്‍ ദ്വീപുകള്‍ എന്നു വിലയിരുത്തി സോണ്‍ നാലില്‍ ഉള്‍പ്പെടുത്തി.
അതേസമയം, വലിയ മുടക്കുമുതലുള്ള അനധികൃത നിര്‍മാണ പ്രവര്‍ത്തനങ്ങള്‍ക്ക് പഠന കേന്ദ്രം അധികൃതര്‍ ഒത്താശ ചെയ്ത് ക്ലിയറന്‍സ് നല്‍കുന്നതായും ഹരജിയില്‍ ആരോപിച്ചിരുന്നു.