പട്ടാമ്പി: താലൂക്കില്‍ നാല് ഡെങ്കിപനിമരണം റിപ്പോര്‍ട്ട് ചെയ്തതോടെ  എന്‍.എച്ച്.എം, ഡി.എം.ഒ മെഡിക്കല്‍ കോളജ് ഡോക്ടര്‍മാരുടെ യോഗം വിളിച്ച് പട്ടാമ്പി മേഖലയില്‍ റിട്ട.ഡോക്ടര്‍മാരടക്കമുള്ളവരുടെ പ്രത്യേക സംഘത്തെ നിയോഗിക്കുന്നതിന് ജില്ലാ അവലോകനയോഗത്തില്‍ ധാരണയായി. അവധിയില്‍ പോയ ഡോക്ടര്‍മാര്‍ കഴിയുന്നതും വേഗം തിരിച്ച് ജോലിയില്‍ പ്രവേശിക്കണമെന്നും യോഗത്തില്‍ മന്ത്രി എ.സി മൊയ്തീന്‍ നിര്‍ദേശിച്ചു.
പഞ്ചായത്തുകളിലെ ജലനിധി പദ്ധതികളുടെ ജലശുചീകരണവും ക്ലോറിനൈസേഷനും വാര്‍ഡ് തലത്തില്‍ നടപ്പാക്കാനും തീരുമാനമായി. പനിപടരുന്നത് തടയുന്നതിനുള്ള പ്രതിരോധ നടപടികളെകുറിച്ച് ചര്‍ച്ച ചെയ്യാന്‍ എം.എല്‍.എ, തദ്ദേശസ്വയംഭരണ സ്ഥാപന പ്രതിനിധികള്‍, വിവിധ വകുപ്പുകളിലെ ഉദ്യോഗസ്ഥര്‍, യുവജനസംഘടനകള്‍ എന്നിവരുടെ നേതൃത്വത്തില്‍ ഉടന്‍ യോഗം വിളിക്കാനും മന്ത്രി നിര്‍ദേശം നല്‍കി.
ശുചിത്വമിഷന്‍ വിവിധ പഞ്ചായത്തുകളിലും നഗരസഭകളിലും നടപ്പാക്കേണ്ട് പ്രതിരോധപ്രവര്‍ത്തനങ്ങള്‍ ചെയ്യണമെന്നും ഇതിനുവേണ്ട ഫണ്ട് പഞ്ചായത്തിന്റെ തനത് ഫണ്ടില്‍നിന്നോ പ്ലാനിങ് ഫണ്ടില്‍നിന്നോ എടുക്കണമെന്നും പിന്നീട് സര്‍ക്കാര്‍ ഇത് തിരികെ നല്‍കുമെന്നും മന്ത്രി പറഞ്ഞു. യോഗത്തില്‍ ജില്ലാകലക്ടര്‍ പി. മേരികുട്ടി, എം.എല്‍.എമാരായ മുഹമ്മദ് മുഹ്‌സിന്‍, ഷാഫി പറമ്പില്‍, ഡി.എം.ഒ കെ.പി റീത്ത, ജില്ലാ പഞ്ചായത്ത് പ്രസിഡന്റ് കെ. ശാന്തകുമാരി, എം.ബി രാജേഷ് എം.പി സംബന്ധിച്ചു.