കോയമ്പത്തൂര്‍: വ്യവസായിയെ പറ്റിച്ച കേസില്‍ സരിത എസ്.നായര്‍, ബിജു രാധാകൃഷ്ണന്‍ ഉള്‍പ്പെടെ മൂന്ന് പേര്‍ക്ക് മൂന്ന് വര്‍ഷം തടവ് ശിക്ഷ. കോയമ്പത്തൂര്‍ കോടതിയുടേതാണ് വിധി.
കാറ്റാടിയന്ത്രം സ്ഥാപിക്കാനെന്ന പേരില്‍ കോയമ്പത്തൂര്‍ സ്വദേശിയായ ബിസിനസുകാരന്റെ കയ്യില്‍ നിന്ന് 26 ലക്ഷം രൂപ തട്ടിയെ കേസിലാണ് വിധി. സരിത എസ് നായര്‍, ബിജു രാധാകൃഷ്ണന്‍, ആര്‍.പി രവി എന്നിവര്‍ മൂന്ന് വര്‍ഷം തടവ് ശിക്ഷ അനുഭവിക്കണം. 10000 രൂപ പിഴയും ഒടുക്കണം.
കോയമ്പത്തൂര്‍ വടവള്ളി രാജ്‌നാരായണന്‍ ടെക്‌സ്‌റ്റൈല്‍സ് മാനേജിംഗ് ഡയറക്ടര്‍ ത്യാഗരാജന്‍ നല്‍കിയ കേസിലാണ് വിധിയുണ്ടായത്. ഇന്റര്‍നാഷനല്‍ കണ്‍സള്‍ട്ടന്‍സി ആന്റ് മാനേജ്‌മെന്റ് സര്‍വിസസ് എന്ന പേരില്‍ സരിത നായര്‍ എക്‌സിക്യൂട്ടീവ് ഡയറക്ടറും ബിജു രാധാകൃഷ്ണന്‍ മാനേജിംഗ് ഡയറക്ടറും ആര്‍.പി രവി ഡയറക്ടറുമായി തുടങ്ങിയ കമ്പനിയില്‍ കാറ്റാടി യന്ത്രങ്ങള്‍ സ്ഥാപിക്കാമെന്ന് പറഞ്ഞ് 26 ലക്ഷം രൂപ തട്ടിച്ചെന്നായിരുന്നു പരാതി.