കണ്ണൂര്‍: അന്തരിച്ച സിപിഎം പ്രവര്‍ത്തകനും കൂത്തുപ്പറമ്പ് സമരനായകനുമായ പുഷ്പന്റെ മൃതദേഹം ഇന്ന് സംസ്‌കരിക്കും. കോഴിക്കോട് ഡി.വൈ.എഫ്.ഐ ജില്ല കമ്മിറ്റി ഓഫീസിലെ പൊതുദര്‍ശനത്തിന് ശേഷം രാവിലെ എട്ടോടെ മൃതദേഹം വിലാപയാത്രയായി തലശ്ശേരിയിലേക്ക് കൊണ്ടുപോകും. വിവിധ ഇടങ്ങളില്‍ ആളുകള്‍ക്ക് അന്തിമോപചാരം അര്‍പ്പിക്കാന്‍ സൗകര്യം ഏര്‍പ്പെടുത്തും. 

രാവിലെ പത്തുമണി മുതല്‍ പതിനൊന്ന് വരെ തലശ്ശേരി ടൗണ്‍ ഹാളിലും, ചൊക്ലി രാമവിലാസം സ്‌കൂളിലും പൊതുദര്‍ശനമുണ്ടാകും. തുടര്‍ന്ന് വൈകീട്ട് അഞ്ചുമണിയോടെ ചൊക്ലിയിലെ വസതി പരിസരത്ത് സംസ്‌കരിക്കും. പുഷ്പനോടുള്ള ആദര സൂചകമായി കൂത്തുപ്പറമ്പ്, തലശ്ശേരി നിയമസഭാ മണ്ഡലങ്ങളില്‍ സിപിഎം ഹര്‍ത്താലിന് ആഹ്വാനം ചെയ്തിട്ടുണ്ട്. 

കൂത്തുപ്പറമ്പ് വെടിവെപ്പില്‍ ഗുരുതരമായി പരിക്കേറ്റ് കിടപ്പിലായിരുന്ന പുഷ്പന്‍ ശനിയാഴ്ച്ച ഉച്ചകഴിഞ്ഞ് 3.30 ഓടെ കോഴിക്കോട്ടെ സ്വകാര്യ ആശുപത്രിയിലാണ് മരിച്ചത്. ആഗസ്റ്റ് രണ്ടിന് വൈകീട്ട് അതീവഗുരുതരാവസ്ഥയില്‍ ആശുപത്രിയില്‍ പ്രവേശിപ്പിച്ചിരുന്നു. പിന്നീട് ഹൃദായാഘാതമുണ്ടായതിനെ തുടര്‍ന്ന് വെന്റിലേറ്ററിലേക്ക് മറ്റിയെങ്കിലും ജീവന്‍ രക്ഷിക്കാനായില്ല. 

1994ലാണ് നവംബര്‍ 25നാണ് കേരള മനസാക്ഷിയെ നടുക്കിയ കൂത്തുപ്പറമ്പ് പൊലിസ് വെടിവെപ്പുണ്ടായത്. സംഭവത്തില്‍ അഞ്ച് ഡിവൈഎഫ്.ഐ പ്രവര്‍ത്തകരാണ് കൊല്ലപ്പെട്ടത്. വെടയേറ്റ് സുഷുമ്‌നനാഡി തകര്‍ന്ന് കഴുത്തിന് താഴെ ചലനശേഷി നഷ്ടമായ പുഷ്പ്പന്‍ കഴിഞ്ഞ 30 വര്‍ഷമായി കിടപ്പിലായിരുന്നു.

Koothuparamba  leader Pushpans cremation today Mourning journey from Kozhikode to Thalassery