കുന്നംകുളം: ശക്തമായ മഴയിലും കാറ്റിലും കുന്നംകുളം ആര്‍ത്താറ്റ് സെന്റ് മേരീസ് ഓര്‍ത്തഡോക്‌സ് കത്തീഡ്രല്‍ പള്ളിയുടെ മേല്‍ക്കൂര തകര്‍ന്ന് വീണ് 20 പേര്‍ക്ക് പരുക്കേറ്റു. ഇന്നലെ ഉച്ചയ്ക്ക് 12 മണിയോടെയായിരുന്നു കാറ്റില്‍ മേല്‍ക്കൂര തകര്‍ന്നത്.
പള്ളിയിലെ രണ്ടാമത്തെ കുര്‍ബാനയ്ക്ക് ശേഷം വിശ്വാസികള്‍ പിരിഞ്ഞുപോയശേഷമായിരുന്നു അപകടം. പള്ളിയില്‍ നടക്കേണ്ട യോഗത്തിനായി കാത്തിരുന്നവര്‍ക്കാണ് പരുക്കേറ്റത്.
മേല്‍ക്കൂരയുടെ ഓട് തെറിച്ച് വീണാണ് ഇവര്‍ക്ക് പരുക്ക്. കുന്നംകുളം പൊലിസും ഫയര്‍ഫോഴ്‌സും നാട്ടുകാരും ചേര്‍ന്നാണ് രക്ഷാപ്രവര്‍ത്തനം നടത്തിയത്. സമീപത്തെ തെങ്ങുകളും മറ്റ് മരങ്ങളും വീണ് ഓഫിസ് കെട്ടിടവും തകര്‍ന്നിട്ടുണ്ട്. കാറ്റില്‍ പള്ളി സെമിത്തേരിയിലെ മുഴുവന്‍ മരങ്ങളും ഒടിഞ്ഞു വീണു. പള്ളിയങ്കണത്തില്‍ നിര്‍ത്തിയിട്ടിരുന്ന നിരവധി വാഹനങ്ങള്‍ക്കും നാശനഷ്ടം സംഭവിച്ചു.