കൊണ്ടോട്ടി: കരിപ്പൂര്‍ വിമാനത്താവളം വഴി അനധികൃതമായി കടത്താന്‍ ശ്രമിച്ച 1807.82 ഗ്രാം സ്വര്‍ണം എയര്‍ കസ്റ്റംസ് ഇന്റലിജന്‍സ് വിഭാഗം പിടികൂടി. സംഭവവുമായി ബന്ധപ്പെട്ട് കണ്ണൂര്‍ കോടിയേരി സ്വദേശി എ.പി നൗഫലിനെ അറസ്റ്റ് ചെയ്തു.
എയര്‍ ഇന്ത്യയുടെ ഐ.എക്‌സ്-344 ഷാര്‍ജ-കോഴിക്കോട് വിമാനത്തിലാണ് ഇയാള്‍ കരിപ്പൂരിലെത്തിയത്.
രഹസ്യവിവരം ലഭിച്ചതനുസരിച്ച് കാത്തിരുന്ന എയര്‍ കസ്റ്റംസ് ഇന്റലിജന്‍സ് വിഭാഗം ഇയാളെ ദേഹ പരിശോധന നടത്തിയപ്പോള്‍ മിശ്രിത രൂപത്തില്‍ സ്വര്‍ണം കണ്ടെത്തുകയായിരുന്നു. ഷര്‍ട്ട് കോളറിന്റെ പിന്‍ഭാഗം, അരക്കെട്ടിലെ ഭാഗം, പാന്റ്‌സിന്റെ താഴ്ഭാഗം എന്നിവിടങ്ങളില്‍ ഒളിപ്പിച്ച നിലയിലായിരുന്നു സ്വര്‍ണം. 20 പാക്കറ്റുകളിലായി 2450.558 ഗ്രാം മിശ്രിതമാണ് കണ്ടെത്തിയത്. ഇതില്‍നിന്ന് 1807.82 ഗ്രാം സ്വര്‍ണം വേര്‍തിരിച്ചെടുത്തു.പിടികൂടിയ സ്വര്‍ണത്തിന് പിപണിയില്‍ 54,57,809 രൂപ വിലവരും. കസ്റ്റംസ് കമ്മിഷണര്‍ സുമിത്ത്കുമാറിന്റെ നിര്‍ദേശാനുസരണം ജോ. കമ്മിഷണര്‍ അനില്‍ രാജന്‍, അസി. കമ്മിഷണര്‍മാരായ നിഥിന്‍ ലാല്‍, രാജേന്ദ്ര ബാബു, സൂപ്രണ്ടുമാരായ ബഷീര്‍ അഹമ്മദ്, സി.സി ഹാന്‍സണ്‍, ഇന്റലിജന്‍സ് ഓഫിസര്‍മാരായ എം. മനോജ്, രബീന്ദ്ര കുമാര്‍, ചന്ദ്രകുമാര്‍, നരസിംഹ നായിക്, ഹവില്‍ദാര്‍ എന്‍. മോഹനന്‍ എന്നിവരടങ്ങിയ സംഘമാണ് കള്ളക്കടത്ത് പിടികൂടിയത്.