എടപ്പാള്‍: വീട്ടമ്മയുടെ കഴുത്തില്‍ കത്തിവച്ചു ക്ലോറോഫോം മണപ്പിച്ചു  20 പവന്‍ സ്വര്‍ണവും പണവും കവര്‍ന്ന സംഭവത്തില്‍ പ്രതികളുടെ രേഖാചിത്രം ഇന്നു വരക്കും. ഇതിനായുള്ള വിദഗ്ധ സംഘം ഇന്നെത്തുമെന്നു പൊന്നാനി സി.ഐ മുഹമ്മദ് ഹനീഫ അറിയിച്ചു.
കൂടാതെ മൊബൈല്‍ ടവര്‍ കേന്ദ്രീകരിച്ചുള്ള അന്വേഷണം പുരോഗമിക്കുന്നതായും സംശയാസ്പദമായ നമ്പറുകള്‍ പരിശോധിച്ചു വരികയാണെന്നും അദ്ദേഹം അറിയിച്ചു.
മരുമകന്റെ സുഹൃത്തുക്കളെന്നു പരിചയപ്പെടുത്തി ബൈക്കിലെത്തിയ രണ്ടണ്ടംഗ സംഘമാണു കോലൊളമ്പ് വൈദ്യര്‍മൂല മാക്കാലിക്കല്‍ ഇന്ദിര(64)യെ ഭീഷണിപ്പെടുത്തി അണിഞ്ഞിരുന്നതും അലമാരയില്‍ സൂക്ഷിച്ചിരുന്ന മകളുടെ ആഭരണങ്ങളും പണവും കവര്‍ന്നത്.
സമാന കേസുകളില്‍ പ്രതികളായുള്ളവരുടെ ചിത്രങ്ങള്‍ കഴിഞ്ഞ ദിവസം അന്വേഷണ സംഘം ഇന്ദിരയെ കാണിച്ചിരുന്നു. ഇതില്‍ സംശയം പ്രകടിപ്പിച്ചവരെക്കുറിച്ചുള്ള അന്വേഷണവും ഇതോടൊപ്പം നടന്നുവരുന്നുണ്ട്.