തൃശൂര്‍: മൂന്നു ദിവസം മുന്‍പ് കാണാതായ ചേറ്റുപുഴ സ്വദേശിനിയായ വീട്ടമ്മ പൊള്ളാച്ചിയില്‍ വച്ച് മരിച്ച സംഭവം കൊലപാതകമെന്ന് തെളിഞ്ഞു.പ്രതി മുളങ്കുന്നത്തുകാവ് പാലുവളപ്പില്‍ പങ്കജാക്ഷന്‍ മകന്‍ സിജീഷ്(33)നെ തൃശൂര്‍ ഈസ്റ്റ് പൊലിസ് അറസ്റ്റു ചെയ്തു.
ഇവര്‍ തമ്മിലുള്ള പണമിടപാടാണ് സംഭവത്തിലേക്ക് വഴിവെച്ചത്.തൃശൂരിലെ തുണിക്കടയില്‍ ജീവനക്കാരിയായ ചേറ്റുപുഴ തട്ടുപറമ്പില്‍ ലോലിത(42)യാണ് ക്രൂരമായ കൊലപാതകത്തിന് ഇരയായത്.
മൂന്ന് ദിവസം മുന്‍പ് കാണാതായ ലോലിതയ്ക്കുവേണ്ടി അമ്മ ഈസ്റ്റ് പൊലിസില്‍ പരാതി നല്‍കിയിരുന്നു.അന്വേഷണം നടക്കുന്നതിനിടയിലാണ് ലോലിത കോയമ്പത്തൂര്‍ മെഡിക്കല്‍ കോളജില്‍ വച്ച് മരിച്ചെന്നറിയുന്നത്.വ്യാഴാഴ്ചയാണ് ലോലിതയെ അബോധാവസ്ഥയില്‍ പൊള്ളാച്ചി-ധാരാപുരം ദേശീയപാതയില്‍ കണ്ടെത്തുന്നത്.തുടര്‍ന്ന് കോയമ്പത്തൂര്‍ മെഡിക്കല്‍ കോളജില്‍ പ്രവേശിപ്പിക്കുകയായിരുന്നു.രാത്രി ഒമ്പതോടെ മരണം സ്ഥിരീകരിച്ചു.വിഷം ഉള്ളില്‍ചെന്നതാണ് മരണകാരണം.
 കഴിഞ്ഞ ഒരു വര്‍ഷമായി പരിചയത്തിലായിരുന്നു ലോലിതയും മുളങ്കുന്നത്തുകാവില്‍ ടാക്‌സി ഡ്രൈവറായിരുന്ന സിജീഷും. സിജീഷിന് പണയം വയ്ക്കുന്നതിനായി ലോലിത മാലയും വളയും നല്‍കി.തുടര്‍ന്ന് ദിവസങ്ങള്‍ക്കു ശേഷം സ്വര്‍ണ്ണം തിരികെ ചോദിച്ച് ലോലിത സിജീഷിനെ സമീപിച്ചു.
ഒടുവില്‍ സ്വര്‍ണ്ണം തിരികെ തരാമെന്നും രാത്രി ജോലി കഴിഞ്ഞ് തുണിക്കടയ്ക്കു പുറത്ത് നിന്നാല്‍ മതിയെന്നും പറഞ്ഞു.രാത്രി പഴനിയിലേക്ക് ഓട്ടമുണ്ടെന്ന് പറഞ്ഞ് ഉടമസ്ഥന്റെ പക്കല്‍ നിന്നും ഇന്നോവ കാര്‍ എടുത്തു.ശനിയാഴ്ച ലോലിതയെ കാറില്‍ കയറ്റി പഴനിയിലേയ്‌ക്കെന്ന് പറഞ്ഞ് കൊണ്ടുപോയി.പണയമിടപാട് സ്ഥാപനത്തിന്റെ ഉടമ സ്ഥലത്തില്ലെന്നും സ്വര്‍ണ്ണം തിരികെ എത്തുമ്പോള്‍ നല്‍കാമെന്നും പറഞ്ഞു.വഴിമദ്ധ്യേ കയ്യില്‍ കരുതിയിരുന്ന വിഷം കലര്‍ത്തിയ ജ്യൂസ് കുടിപ്പിച്ചു.
തുടര്‍ന്ന് അബോധവസ്ഥയിലായ ലോലിതയെ ദേശീയപാതയില്‍ തള്ളുകയായിരുന്നു.മരണം ഉറപ്പാക്കുവാന്‍ ശ്വാസം മുട്ടിച്ച് ഒരു ശ്രമം കൂടി സിജീഷ് നടത്തി.തെളിവുകള്‍ ഓരോ സ്ഥലങ്ങളിലായി ഉപേക്ഷിച്ച് തിരികെ വരികയായിരുന്നു.
മൃതദേഹം ഇന്നലെ മെഡിക്കല്‍ കോളജില്‍ പോസ്റ്റുമോര്‍ട്ടം നടത്തി ബന്ധുക്കള്‍ക്ക് വിട്ടുകൊടുത്തു.ലോലിതയില്‍ നിന്നും കൊലപാതകത്തിനിടയില്‍ കവര്‍ന്നെടുത്ത സ്വര്‍ണ്ണങ്ങള്‍ പൊലീസ് കണ്ടെടുത്തു.സിറ്റി അസി.പൊലീസ് കമ്മീഷ്ണര്‍ ഷാഹുല്‍ ഹമീദിന്റെ നിര്‍ദ്ദേശാനുസരണം ഈസ്റ്റ് സി.ഐ സേതുവാണ് കേസ് അന്വേഷിച്ചിരുന്നത്.
സി.ഐ,വെസ്റ്റ് സി.ഐ വി.കെ രാജു,ഈസ്റ്റ് എസ്‌ഐ ലാല്‍കുമാര്‍,എസ്‌ഐ സതീഷ് പുതുശ്ശേരി,ഷാഡോ പോലീസ് എസ്‌ഐമാരായ എം.പി ഡേവിസ്,വി.കെ അന്‍സാര്‍,എ.എസ്.ഐമാരായ പി.എം റാഫി,എന്‍.ജി സുവൃതകുമാര്‍,സി.പി.ഒമാരായ കെ.ഗോപാലകൃഷ്ണന്‍,ജയന്‍,ടി.വി ജീവന്‍,പി.കെ പഴനിസ്വാമി,സി.പി ഉല്ലാസ്,എം.എസ് ലിഗേഷ് എന്നിവര്‍ അന്വേഷണ സംഘത്തിലുണ്ടായിരുന്നു.