തൃപ്പൂണിത്തുറ:  ഉദയംപേരൂര്‍ കൊച്ചുപള്ളിക്കു സമീപം കാര്‍ തടഞ്ഞുനിര്‍ത്തി യുവാവിന്റെ സ്വര്‍ണമാല കവര്‍ന്ന സംഭവത്തില്‍ രണ്ടു പ്രതികളെ പൊലിസ് അറസ്റ്റ് ചെയ്തു. ഉദയംപേരൂര്‍ സ്വദേശികളായ ഉപ്പൂട്ടിപ്പറമ്പില്‍ കിരണ്‍ (26) കൊച്ചോളിപ്പറമ്പില്‍ ആഷിക് (19) എന്നിവരെയാണ് ഉദയംപേരൂര്‍ പൊലിസ് സബ് ഇന്‍സ്‌പെക്ടര്‍ കെ.എ ഷിബിനും സംഘവും അറസ്റ്റ് ചെയ്തത്.
കഴിഞ്ഞ 23നാണ് സംഭവം നടന്നത്. രാത്രി പത്തിന് വൈക്കം റോഡിലൂടെ യുവാവ് കാറില്‍ പോകുമ്പോള്‍ ഉദയംപേരൂര്‍ കൊച്ചുപള്ളിക്കു സമീപം റോഡിനു നടുവില്‍ കല്ലുനിരത്തി പ്രതികള്‍ കാര്‍ തടയുകയും കാറിനടുത്തുചെന്ന് യുവാവിന്റെ കഴുത്തില്‍ കിടന്നിരുന്ന ഒന്നര പവന്റെ മാല പൊട്ടിച്ചെടുത്ത് രണ്ടുപേരും ഓടി രക്ഷപെടുകയും ചെയ്തു. ഉദയംപേരൂര്‍ പൊലിസില്‍ യുവാവ് നല്‍കിയ പരാതിയുടെ അടിസ്ഥാനത്തില്‍ നടത്തിയ അന്വേഷണത്തിലാണ് പ്രതികള്‍ പിടിയിലായത്.  പൊട്ടിച്ചെടുത്ത മാല പ്രതികളില്‍നിന്നും പൊലിസ് കണ്ടെടുത്തു. കോടതിയില്‍ ഹാജരാക്കിയ പ്രതികളെ 14 ദിവസത്തേക്കു റിമാന്‍ഡ് ചെയ്തു.