ഗുവാഹത്തി: അസമിലെ കൊക്രജാറില്‍ കഴിഞ്ഞ ദിവസമുണ്ടായ ഭീകരാക്രമണത്തില്‍ പങ്കുണ്ടെന്ന് കരുതുന്ന ഭീകരന്റെ ദൃശ്യങ്ങള്‍ പുറത്തുവന്നു. നാലംഗ അക്രമി സംഘത്തിലുണ്ടായിരുന്നെന്ന് സംശയിക്കുന്ന യുവാവിന്റെ ചിത്രങ്ങളാണ് പുറത്തുവന്നത്. നീല ചെക്ക് ഷര്‍ട്ടും ജീന്‍സും റെയിന്‍ കോട്ടും ധരിച്ച് ബാഗില്‍ തോക്കുമായി നടന്നു നീങ്ങുന്ന യുവാവിന്റെ ദൃശ്യങ്ങളാണ് പുറത്തുവന്നത്. സംഭവത്തിന് ദൃക്‌സാക്ഷിയായ ആള്‍ എടുത്ത പടങ്ങളാണ് മാധ്യമങ്ങളിലൂടെ പുറത്തു വന്നത്. വെടിവയ്പ്പിന് മുമ്പ് ചന്തയിലെ തിരക്ക് മനസിലാക്കാന്‍ ആള്‍കൂട്ടത്തിനിടയില്‍ അല്‍പനേരം നില്‍ക്കുന്ന യുവാവിന്റെ ചിത്രവും പുറത്തുവന്നിട്ടുണ്ട്. സൈന്യവുമായുള്ള ഏറ്റുമുട്ടലില്‍ ഒരു തീവ്രവാദി കൊല്ലപ്പെട്ടിരുന്നു. മറ്റുള്ളവര്‍ അതിനിടെ രക്ഷപ്പെടുകയായിരുന്നു.
അതിനിടെ എന്‍.ഐ.എ സംഘം ഇന്നലെ സ്ഥലം സന്ദര്‍ശിച്ചു.കഴിഞ്ഞ ദിവസം ഉച്ചയോടെയാണ് ഗുവാഹത്തിയില്‍ നിന്ന് 220 കിലോമീറ്റര്‍ അകലെ കൊക്രജാറിലെ തിരക്കേറിയ ബാലാജാന്‍ ടിനിയാലി ചന്തയില്‍ ബോഡോ തീവ്രവാദികളെന്നു കരുതുന്ന സംഘം ആക്രമണം നടത്തിയത്. 14 പേര്‍ കൊല്ലപ്പെടുകയും നിരവധി പേര്‍ക്ക് പരുക്കേല്‍ക്കുകയും ചെയ്തിരുന്നു.